Smart Gilas umiskor sa Syria

BEIRUT, Lebanon --- Matapos ilampaso ng Leba­non, bumawi naman ang Smart Gilas nang igu­po ang Syria, 81-67, mula sa pagbibida nina team captain Chris Tiu at Fil-Tongan Asi Taulava sa Group B ng 2010 FIBA-Asia Stankovic Cup dito.

Tumipa si Tiu ng siyam sa kanyang14 points sa third quarter, habang humakot naman ang 6-foot-9 na si Taulava ng 16 points, 19 rebounds at 2 blocks.

Nanggaling ang Nationals sa 59-74 pagyukod sa Lebanese sa kanilang unang laro.

Mula sa 35-40 agwat sa halftime, inagaw ng Smart Gilas ang 63-53 lamang sa third quarter kontra Syria buhat sa siyam na puntos ni Tiu.

Ang 38-anyos na si Tau­la­va ang hinugot ng Smart Gilas matapos magkaroon ng problema sa pagkuha ng kanilang Philippine passport sina naturalization candidate 6’9 Marcus Douthit, 7-foot Fil-Am Greg Slaughter at 6-7 Rabeh Al-Hussaini.

Nagdagdag naman sina Mark Barroca at Mac Baracael ng 16 at 11 points, ayon sa pagkakasunod, samantalang kumolekta si 6’9 Japeth Aguilar ng 6 points, 4 blocks, 3 rebounds at 2 assists.

Nakatakdang sagupain ng Smart Gilas ang Jordan, nanggaling sa 59-63 pagkatalo sa bigating Qatar, para sa kanilang ikatlong laban sa torneo.

Nagmula ang Syria sa 75-83 kabiguan sa Qatar.

Sa Group A, binigo ng Chinese-Taipei ang Kazakhstan, 80-64, habang giniba naman ng paboritong Iran ang Japan, 72-68.