Singwangcha mipatumba ni Aparicio sa 9th round

CEBU, Philippines - Bangis nga lefthook ang gibuhian sa Sugbuanong si Demecillo Singwangcha aron tapuson sa ninth round ang taga-Cagayan de Oro City nga si Joash Aparicio sa main event sa 3rd Lionel Bacaltos Boxing card didto sa Bonifacio Bacaltos Sports and Cultural Centrum, lungsod sa Sibonga.

Nahimong lisud ang away alang ni Singwangcha human usab mipakita og ka-agresibo si Aparicio, apan nakuhaan ang kaidlas ni Aparicio human kini magisii sa iyang walang kilay tungod sa accidental headbutt.

Unang napatumba ni Singwangcha si Aparicio sa round five, apan nakabangun kini aron ipadayun ang pakigsinukliay og kumo batok sa undefeated nga Sugbuanong boksidor. Pag-abot sa ikasiyam nga round, gisegurado na ni Singwangcha nga di na makabarug pa si Aparicio kinsa miligid na ibabaw sa ring sa katapusang 35 segundos.

Sa supporting main event, si Alvin Maquiling mipilde ni Jestoni Pepito Singwangcha pinaagi sa unanimous decision sa ilang ten round superbantamweight bout. Miani usab og daug ang bantamweight nga si Marvin Tampus dihang gipahunong niya sa round 1 si Aljon Salugaol.

Gi-TKO ni Rex Tito Singwangcha ang taga-Mandaue nga si Jerome Buntog sa 1:25 sa round 4, samtang ang flyweight prospect nga si Elmer Pono midaog pinaagi sa majority decision batok ni JR Salvador.

Ang taga-Leyte nga si Jerome Casas midesisyon usab ni Jomar Torion sa Phil-Aust Gym sa ilang four rounder bout. (FREEMAN)