CEBU, Philippines - Bag-ong mga nawung ang migawas nga mananaug sa gipahigayung Run for the Footure kagahapon sa buntag didto sa The Terraces sa Ayala Center-Cebu.
Sa pagkawala sa presensiya sa mga lig-on niyang kaatbang, nakahigayun ang beteranong si Adonis Singson sa pagsakmit sa korona sa 10-k men’s open dihang gitapos niya ang lumba sud sa 33 minutos ug 24.32 segundos.
Nagsunod kaniya ang garbo sa Danao City nga si John Phillip Duenas kinsa masakmit sa ikaduhang luna sa oras nga 33:51.11, samtang si Alvirg Busa mipahiluna sa ikatulo sa oras nga 34:02.03.
Samtang sa women’s class, si Sharon Vega maoy midominar human niya gilabang ang finish line sa oras nga 45:12.83, gisundan sa mga bag-ong sulbong nga sila si Mizraym Capampangan sa oras nga 52:28.22 ug si Helen Palma maoy third placer sa oras nga 54:55.37.
Gidominaran sa produkto sa University of Southern Philippines Foundation (USPF) nga si Joel Delposo ang 5k men’s open sa oras nga 16:25.40, uban nila ni Ian Bernido (16:33.65) ug Jobert Carolino (16:41.46) nga maoy misakmit sa ikaduha ug ikatulong dapit.
Ang top-three finisher sa women’s category gilangkuban sa top gun gikan sa Southwestern University (SWU) Mary Joy Tabal (19:43.46), Joeyry Lee (21:34.25) ug Merlinta Arias (23:29.37).
Migawas nga hari sa 3k category si Robert Daang, samtang si Aiza Suaybaguio maoy miangkon sa korona sa women’s division. (FREEMAN)