CEBU, Philippines – Usa ka semana sa dili pa ipahigayon ang duha ka dagkung lumba -- ang 5th CDU Run ug Pilipinas 25K International Marathon, magpakondisyon una ang mga Sugbuanong runners sa Run for FOOTure karong buntag diha sa The Terraces sa Ayala Center-Cebu.
Gipasiugdahan sa Vicente Sotto Memorial Medical Center (VSMMC) Cancer Institute, ang maong lumba magsilbeng usa ka fund raising program alang sa mga kabus nga congenital clubfoot babies.
Ang lumba adunay tulo ka kategoriya -- 10K, 5K ug 3K.
Kapin sa 1,000 runners ang mohugop karon sa kadalanan nga naglakip sa mga top runners ug mga tinun-an gikan sa nagkadaiyang medical schools sa Sugbu.
Mga dekalibreng runners ang mag-ilog sa titulo sa men's division. Kini naglakip ni Simon Losiaboi, Jess Gonzaga, Joebert Carolino ug Philip Duenas. Samtang magtigi sa korona sa women's category mao sila si Mary Grace Delos Santos uban sa higpit niyang mga karibal nga sila si Mary Joy Tabal ug Madelyn Carter. (BANATSPORTS)