MANILA, Philippines - Isa na lamang ang natitirang bakanteng puwesto para sa susunod na bahagi ng kompetisyon.
Ito ang tatangkaing makuha ng National University sa kanilang pakikipagbuno sa second seeded Ateneo sa patuloy na pag-init ng aksyon ng ikalawang conference ng Shakey’s V-League Season 7 sa ganap na alas-4 ng hapon sa The Arena sa San Juan.
Bagaman nahaharap sa isang mabigat na laban, hahangarin ng Lady Bulldogs na maselyuhan na ang ika-anim at huling tiket para sa quarterfinals ng season-ending conference ng premyadong volleyball league sa bansa at mapasama sa mga quarterfinalists na San Sebastian College (5-1), Ateneo (4-1), Adamson (4-2) , FEU(4-2) at Lyceum (4-3).
Kasalukuyang nasa ikaanim na puwesto sa team standings ang bagitong NU na mayroong 2-4 win-loss card, nasa likuran lamang nila ang nag-aabang na Perpetual Help na mayroong 1-5 na baraha at maaari nilang makaharap sa isang playoff kung sakaling mabigo sila laban sa Lady Eagles, ngunit kung magtatagumpay sila ay tuluyan ng malalaglag ang Lady Altas sa torneo.