Niños hari sa 8th leg

CEBU, Philippines - Wala maapektohi ang    M. Lhuillier Kwarta Padala-Cebu Niños sa nahitabong kagubot niadtong Miyerkules ug ilang gipilde ang host MisOr Meteors sa finals, 75-71, aron langkaton ang korona sa finals sa 8th leg sa Tournament of the Philippines (TOP) didto sa Xavier University, Cagayan de Oro City.

Bisan pa man og wala sila makapahigayon og practice tungod sa risgo sa seguridad human sa nahitabong lamok-lamok batok sa MisOr Meteors, wala kini nahimong babag sa Cebu Niños aron makuha ang ikatulo nilang leg title.

Atubangan sa 5,000 ka mga dumadapig sa ilang kaatbang, gilubong dayon sa Cebu Niños ang Meteors, 54-38 sa second half, apan milusad og bangis nga rally ang host team aron pahakan ang labaw ngadto na lang sa tres puntos sa iskor nga 65-68.

Apan gipapas ni Marlon Basco ang mga paglaum sa MisOr fans, human niya gipasulod ang iyang singko puntos, samtang ang point guard nga si Mark Ababon mipatusak usab sa iyang krusyal nga tres nga maoy mihatag sa Cebu Niños og kuwatro puntos nga labaw, 75-71 sa nahabiling otso segundos sa duwa.

Sa sayo pa, ang Hobe Bihon-Taguig mao ang milangkat sa ikatulong dapit human gipilde ang Ascof Lagundi pinaagi sa overtime sa iskor nga 81-74.  – BANAT NEWS