Balbona, Ruelo Jr. naghari sa Golden Haven chessfest
CEBU, Philippines - Giharian nila ni Andrew Balbona ug Bernardo Ruelo Jr. ang tagsa-tagsa nilang kategoriya sa Golden Haven Chess Tournament didto sa Golden Haven Memorial Park sa Brgy. Binaliw, ning siyudad.
Si Balbona naghari sa kiddies' class human midaog batok sa iyang igsuong si Feliz Shaun sa Buccholz tie-breaker system.
Ang managsuong Balbona parehong nakakuha og singko puntos, apan atol sa tie breaker, si Andrew miposte og 22.50 puntos, samtang si Feliz Shaun mimarka og 22 puntos.
Mi-okupar sa ikatulo ngadto sa ikalima nga mga dapit mao sila si Raffy Benzi, Spencer Alo de Guzman ug Diego Claro.
Atol sa last round pairings, si Andrew mipilde ni John Francis Balbona, samtang si Felix Shaun mipukan ni Spencer de Guzman.
Sa juniors' division, si Ruelo mimakmak sa tanan niyang kaatbang ug naka-iskor og perpektong singko puntos.
Si Kyle Sevillano miangkon sa ikaduha human lang midaog og uno punto batok ni Kraig Quinain.
Mikompleto sa top five mao sila si Mark Balbona ug Airene Robillos.
Sa last round pairings, si Ruelo mipukan ni Sevillano, si Quinain mipilde ni Bentulan ug si Robillos midaog ni Balbona.
Gawas sa ganting salapi, ang tanang top five winners sa duha ka kategoriya nakadawat sab og certificates gikan sa Golden Haven Memorial Park. – BANAT NEWS
- Latest
- Trending
