Binukbukay sa Sibonga

CEBU, Philippines - Panalipdan ni superflyweight prospect Marco Demecillo Singwangcha ang iyang limpyong baraha batok ni Joash Aparecio sa Cagayan De Oro City nga maoy main event sa 3rd Lionel E. Bacaltos Cup Boxing Tournament karong Agosto 7 didto sa Bonifacio Bacaltos Sports and Cultural Centrum, lungsod sa Sibonga.

Ang Sugbuanong knockout artist laraw'ng mokulit sa ikaupat niyang sunod-sunod nga kadaugan. Si Singwangcha katapusang miaway niadtong Hunyo diha sa Lapu-Lapu, diin iyang gitumba si Isidro Balabat sud lang sa unang round.

Gipasiugdahan nila ni Rex 'Wakee' Salud ug Thai promoter Naris Singwangcha, ang maong boxing card modalit usab sa sangka tali nila ni Jestoni Pepito Singwangcha ug Alvin Maquiling sa super bantamweight.

Si Marvin Tampus, sa Bato,Leyte moharong sa   Sugbuanong si Aljon Salugaol, samtang si Rex Tito Singwangcha makigsangka usab ni Jerome Buntog sa Phil-Aust Gym sa Mandaue.

Mokompleto sa undercard mao ang sangka nila ni Elmer Pono batok Raymund Fermin ug Jerome Casas batok Jomar Torion. – BANAT NEWS