8 teams mosalmot sa FYA 2nd season

CEBU, Philippines - Walo ka teams ang kompirmadong mopakita sa ilang labok sa 2nd F. Llamas Youth Association (FYA) basketball tournament nga sugdan karong Domingo diha sa Vicente Sotto Memorial Gym sa barangay Punta Princesa, ning dakbayan.

Ang mga teams nga mosalmot mao ang defending champion Rolly Boyz ni Punta Princesa Brgy. Capt. Rolly Diorico, Viking Haulers ni FYA president Arnel Trinidad, Heartfelt Angels ni Grace Magsalay, Simpolang Barbecue Haus ni Rolando Allan Trinidad, CRV ni Christian R. Villacastin, Angelica ni Michael Garcia, Park ‘N Go Bakeshop ni Romy Rama ug Crissar ni Crissar Llegunas

Sa dili pa pormal sugdan ang kumbati, adunay mubong programa ang himuon ug usa sa mga highlights niini mao ang pagpili og Ms. FYA 2010 ug ingon man best in uniform.

Si Cebu City Mayor Michael L. Rama gidapit sa maong kalihukan. 

Ang organizers miusab sa format sa torneyo gikan sa duha ka brackets sa miaging tuig ngadto na lang sa usa ka bracket.

Ang top two teams human sa single round robin elimination otomatik nga moabante ngadto sa semifinals. Ang nagsunod nga upat ka teams moduwa sa crossover diin ang No. 3 makigsangka batok sa No. 6 ug ang No. 4 moharong sa No. 5.

Ang modaog makigsangka batok sa top two finishers, diin ang modaog maoy mag-abot sa finals.  – BANAT NEWS