CEBU, Philippines - Mipatigbabaw ang garbo sa Sugbu nga si Glenn Lava batok sa laing 35 ka blackbelters lukop nasud aron paghari sa 2010 Smart National Poomsae Taekwondo Championships sa miaging adlaw didto sa Ninoy Aquino Stadium sa Manila.
Si Lava midaog og bulawang medalya sa individual blackbelt category human niya mapuhali ang mga sakop sa nasudnong koponan nga naglakip ni Galilee Tinaya, Jonathan Rilloza ug Gray Ken Raypon sa Cagayan Valley ug sa Baguio City.
Laing Sugbuana nga si Rinna Babanto ang mikabkab sab og bulawang medalya sa individual brownbelt division.
Ang Cebu Taekwondo Club (CTC) gilangkuban nilang Lava, Claire Panaginip, Mcavynger Alob, Babanto, Eloise Herbito, John Paul Pomarse ug Jeah Maglasang nalandig sa ikatulo nga dapit sa synchronize poomsae team event.
Ang lain pang mga miyembro sa Cebu Taekwondo Club nga sila si Iyan Anthony Lim, Alob ug Herbito mitapos sa ikawalo sa ilang tagsa-tagsa ka individual events.
Ang CTC ubos ni coach Avenger Alob mitunol sa ilang kinasingkasing nga pasalamat ngadto ni Tony del Prado,
ang chairman sa Cebu Taekwondo Association tungod sa iyang dakung suporta ug mga plano alang sa maong grupo sa lokal ug internasyonal nga mga kompetisyon. – BANAT NEWS