Joint committee task force para sa Asiad inilatag ng PSC, POC
MANILA, Philippines - Isang joint committee task force ang napagkasunduan ng Philippine Sports Commission (PSC) at ng Philippine Olympic Committee (POC) ukol sa paghahanda ng bansa para sa darating na 16th Asian Games sa Guangzhou, China sa Nobyembre.
Ang dalawang task force ay magtatampok sa tig-tatlong miyembro mula sa PSC at POC.
“What we wanted is not only for Asian Games,” ani POC spokesman Joey Romasanta na siya ring tumatayong Chef De Mission ng Team Philippines para sa 2010 Guangzhou Asiad. “But a more permanent joint committee which is also for all other international tournaments that the Philippines will see action in the future.”
Inihayag ito ni Romasanta matapos ang maikling turnover ceremony sa pagitan nina bagong PSC chairman Richie Garcia at ni dating PSC chief Harry Angping.
Ang paghahanda para sa 2010 Guangzhou Asiad ang nauna nang sinabi ni Garcia na una niyang aasikasuhin sa kanyang unang araw sa sports agency matapos matanggap ang official confirmation mula sa Malacañang noong Hulyo 19.
Kakatawan sa PSC sa task force sina accountant Merly Ibay (finance), Boy Dinglasan (transportation) at Commissioner Chito Loyzaga, habang sina Romasanta, Moying Martelino at Dr. Benjamen Espiritu ng Far Eastern University ang tatayo sa panig ng POC.
Sa 2006 Asian Games sa Doha, Qatar, kabuuang apat na gold, anim na silver at siyam na bronze medals ang naiuwi ng delegasyon.
Ang apat na gintong medalya ay nanggaling kina bantamweight Joan Tipon at flyweight Violito Payla sa boxing, cue artist Antonio Gabica sa men’s 9-ball singles sa billiards at Rene Catalan sa men’s sansou 52-kilogram event.
- Latest
- Trending
