Tabal daog usab sa Run for Kids

CEBU, Philippines – Usa ka adlaw human siya manghawud sa 2nd STC Run, misakmit na usab og laing kampiyonato ang batan-ong running sensation nga si Mary Joy Tabal kinsa maoy reyna sa Run for Kids kagahapon diha sa The Terraces sa Ayala Center-Cebu.

Gipahimuslan gyud pagmaayo ni Tabal ang pagkawala sa presensiya sa top female runner sa Sugbu nga si Mary Grace Delos Santos kinsa didto midagan sa GenSan leg sa 34th Milo Marathon .

Subling gipukan ni Tabal (1:00.36) sa 15k women’s category ang laing duha ka Sugbuanang runners nga sila si Madelyn Carter (1:03.07) ug Rameris Meries (1:09.56) nga maoy second ug third placer.

Apan di sama ni Tabal, napakyas ang Kenyan nga si Simon Losiaboi pagkulit og double-victory human kini wala makadagan tungod sa injury.

Misawo sa pwesto ni Losiaboi si Jess Gonzaga kinsa maoy nag-una sa men’s open sa oras nga 51:14, gisundan nila ni Joebert Carolino (52:07) ug Adonis Singson (54:59) isip second ug third placer.

Midominar sa 6k Open si Joel Delposo sa oras nga 20:29.177, samtang si Riez Enriquez nagsunod sa oras nga 20:40.063 ug si Ian Bernido milandig sa ikatulong dapit sa oras nga 20:41.212.

Si Joery maoy miangkon sa women’s class sa oras nga 25:46.274, gisundan sa managsuong Diongson nga sila si Crizel (26:35.369) ug Clarisse (28:43.885) isip runner-ups.

Nangharus sa 3k Open si John Philip Duenas (08:43) ug Christine Mendoza (17:06). (BANAT NEWS)