Threesome/Stickerworld kampiyon sa JBA Uptown Cup

CEBU, Philippines – Gidominar ni kanhi CAAA MVP James Relampagos ang undergoal, samtang si playing coach Tonyson 'Mr. Showman' Lee mi-iskor og sagunsong siyete puntos sa fourth quarter alang sa Threesome/Stickerworld nga yano kaayong midaog batok sa Sherilin Plastics, 88-72 aron pagsakmit sa titulo sa JCI 15th Jaycees Basketball Association (JBA) Uptown Cup niadtong Miyerkules diha sa City Sports Club-Cebu gym sa Cebu Business Park.

Si Relampagos, kanhi USJ-R Jaguar mibahog og 28 puntos aron pangulohan ang opensa sa Threesome nga nakatilaw dayon og korona sa ilang debut season.

Si Lee mihimo’g siyete puntos sa fourth period nga kabahin sa ilang 17-6 run aron moposte og 20 puntos nga labaw, 86-66 sa nahabiling 2:22 sa duwa.

 Si Lee ug ang ilang point guard nga si Glen Besanes parehong mibahog og 11 puntos. Ang gamitoy'ng tirador nga si Dexter So mitira og 14 puntos alang sa maong kadaugan.

Si Jeremy Huang mao sab ang nangu sa Sherilin sa iyang 23 puntos, si Dave Lim nga naapektohan sa depensa ni Relampagos miabuno og 17 puntos.

Maayo untang nakaduwa si Edmund Odulio, apan wala siya makasustenir dihang misuol ang iyang piang human nagkabangga ang iyang tuhod sa laing teammate samtang nag-rebound ug miamot la'g 11 puntos.

Nakadugang sa kapildihan sa Sherilin mao ang wala pagduwa sa ilang starting guard nga si Dennis Que.

Sa sayo pa, ang AMBL/ACDC ni playing coach Dr. Boy Te milamoy sa Mang Inasal, 82-73 aron pagsakmit sa ikatulong puwesto. 

Wala hinuon moduwa si Mang Inasal team owner Carlos Porras Jr. ug ang ilang reinforcements nga sila si Montoy Singson ug Opel Cabaltera.

Nangu sa AMBL mao si Jimbo Noel nga mipabuto og 22 puntos, samtang si Franco Te miamot og 18 puntos lakip na ang upat ka three-pointer.

Si Bronson Peña maoy nagmangtas sa Mang Inasal nga misawsaw og 27 puntos. 

Puntos matag USA

Unang duwa:

AMBL/ACDC (82) - Noel 22, F. Te 18, Manal 10, Sullano 9, Balangauan 7, Hernandez 6, B. Te 6

Mang Inasal (73) - Peña 27, Barreto 23, Salgado 11, Nieves 5, Lazaro 3

Ikaduhang duwa:

Threesome (88) - Relampagos 28, So 14, Lee 11, Besanes 11, O. Go 7, conde 3, Rosal 3, Flores 2, Tiongco 2

Sherilin (72) - Huang 23, Lim 17, Odulio 11, Jumawan 6, Marquez 6, Co 4, Go 2, Lopez 2. (BANAT SPORTS)