CEBU, Philippines – Nakahigayon na usab ang garbo sa Southwestern University (SWU) nga si Mary Joy Tabal pagsakmit og titulo sa 8K women’s division sa 2nd St. Theresa’s College-Move with AIR Run kagahapon diha sa STC grounds sa Mango Avenue, ning siyudad.
Kini gumikan kay wala mosalmot ang giilang reyna sa Cebu marathon nga si Mary Grace Delos Santos nga atua karon sa GenSan aron modagan sa regional qualifiers sa 34th Milo National Marathon.
Bisan wala si Delos Santos, nakasugat gihapon og hugot nga kompetisyon si Tabal batok sa beteranang si Madelyn Carter, kinsa mipahiluna sa ikaduhang, samtang si Mereeis Ramirez ang midaog sa ikatulo.
Sama sa naandan, si Kenyan Missionary Simon Losiaboi mao ang naghari sa men’s open. Sila si Joel Delposo ug Joebert Carolino mitapos sa ikaduha ug ikatulong dapit.
Si Philip Duenas mao ang nidominar sa 4K run, samtang si Joeyry Lee mao ang reyna sa women’s class. (BANAT SPORTS)