CEBU, Philippines - Bangis nga gubat alang sa kampiyonato ang gipaabot sa 6th Governor Gwen Garcia Unity Volleyball (GUV) Cup nga gikatakdang sugdan karong Septiyembre.
Tungod kini sa pag-uyon sa mga tigpasiugda nga ang matag koponan puwedeng makakuha og duha ka imports aron mopalig-on sa tagsa-tagsa nilang line-ups.
"We agreed to allow two imports per team so that GUV Cup will be more competitive and more exciting. At the same time, this would serve as the team’s motivation in the competition," matud ni Cebu Volleyball Association (CEVA) president Jun San Juan.
Dugang pa ni San Juan nga ang reinforcements bukas ngadto sa tanang entrante. Ang mga koponan gihataga'g kagawasan sa pagkuha og national o international players aron moduwa uban kanila ning labing daku ug bongga nga volleyball event sa rehiyon ug sa tibuok nasud.
Ang organizers sa GUV Cup magtigum karong Miyerkules diha sa Capitol Social Hall aron tukion ang uban pang mga importanteng butang kalabot sa pagpahigayon sa tinuig nga kompetisyon. – BANAT NEWS