CEBU, Philippines - Wala maglisud si Alvin Villa sa iyang duwa bisan og bag-o ang katimbang dihang milansang kini og sunod-sunod nga kadaugan sa senemanang Yayoy’s Grill Darts Tournament diha sa Yayoy’s Grill and Resto Bar sa Orchid Street sa Brgy. Capitol Site, ning siyudad.
Si Villa, kinsa nakigpares ni Gil Arco, mipukan sa tandem nilang Allan Veloso ug Roger Lee alang sa unang dapit.
Si Jerous Ponce, ang katimbang ni Villa sa miaging semana, mitapos sa ikatulo uban ni Odong Pamatian, samtang si Reyden Colina ug Winnie Ocañada nahimutang sa ikaupat nga dapit.
Ugma, usa ka dakung gubat diha sa Yayoy’s Grill nunot sa pagpahigayon sa 1st Mayor Mike Rama Inter-Barangay Darts Tournament.
Aduna kini tulo ka kategoriya -- 4-man team, classified doubles ug open youth singles. (BANAT NEWS)