Garcia bagong PSC chairman

MANILA, Philippines - Bagamat inirekomenda siya ng tiyuhin ng Pangu­lo ng bansa, hindi ito makaka­apekto sa gagawin niyang desisyon bilang bagong chair­man ng Philippine Sports Commission (PSC).

Ito ang nilinaw kaha­pon ni Richie Garcia sa isang press conference sa PSC Board Room sa PSC Building sa Rizal Memorial Sports Complex sa Vito Cruz, Manila hinggil sa pag­rerekomenda sa kanya ni Philippine Olympic Committee (POC) chief Jose “Peping” Cojuangco, Jr. kay Pangulong Benigno “Noynoy” Aquino III.

“Hindi naman porke sinabi ni Cong (Cojuangco) ay gagawin namin. And besides, hindi naman namin puwedeng aprubahan ang labag sa batas,” ani Garcia kay Cojuangco, dating Congressman ng Tarlac.

Nilinaw ni Garcia na ang bawat desisyon ng sports agency ay mangga­galing sa PSC Board na kinabibi­la­ngan nina Commis­sio­ners Chito Loyzaga, Col. Buddy Andrada, Atty. Jolly Mendoza at Akiko Thomson.

Tanging ang Olympian na si Thomson, naupo bi­lang Commissioner noong 20­08, ang naiwan sa mga miyembro ng dating PSC Board na dating pinamunuan ni chairman Harry Ang­ping.

“Definitely, this will be an active board. Magkakaroon ang mga Commissioners natin ng mga respective func­tions nila. Lahat ng de­sisyon ay hindi manggagaling sa akin as chairman kundi from the board,” sabi ng 64-anyos na si Garcia, nagsilbi na ring Commissioner sa panahon ni dating Pangulong Joseph Estrada at Gloria Macapagal-Arroyo.

Unang naupo ang da­ting national golfer na si Gar­cia bilang Commissio­ner noong 1998 sa panahaon ni Presidente Estrada at muling nailuklok sa adminis­trasyon ni Presidente Arroyo noong 2003 hanggang mapalitan noong 2006.

Uupo naman si Dina Ber­nado, dating Southeast Asian Games gold meda­list sa traditional boat race, bilang executive director ng komisyon.