CEBU, Philippines - Gikitkit sa Threesome/Stickerworld ang Mang Inasal, 96-80, samtang ang Sherilin Plastic mipulbos sa AMBL/ACDC, 87-77 aron maoy magpinaksitay sa kampiyonato sa JCI 15th Jaycees Basketball Association (JBA) Metro Cebu Uptown basketball tournament diha sa City Sports Club-Cebu gym sa Cebu Business Park.
Si James Relampagos mi-iskor og 28 puntos alang sa Threesome/Stickerworld nga igo na kaayo pagpakgang sa 31 puntos sa top gunner sa Mang Inasal nga si Montoy Singson.
Si Dexter So ug Voltaire Rosal midugang og 19 ug 11 puntos alang sa Threesome/Stickerworld, kinsa maoy paborito nga team sa torneyo.
Sa laing duwa, lima ka players ang mitusak og double figures alang sa Sherilin ni team owner Richard Mercado nga gipangulohan sa lig-ong sentro nga si Dave Lim nga adunay 27 puntos. Si Jeremy Huang miamot og 19 puntos, samtang si Mercado mitimang og 13.
Sila si Dennis Que ug Edmund Odulio mi-iskor og 12 puntos matag usa alang sa Sherilin Plastics.
Ang kanhi USC Warrior nga si Jason Jay Estella maoy nangu sa AMBL/ACDC pinaagi sa iyang 25 puntos. Si Franco Te mitampo og 19 puntos, samtang si Fritz Sullano adunay 10 puntos sa ilang kapildihan.
Puntos Matag Usa
Unang duwa:
Threesome/Stickerworld (96) - Relampagos 28, So 19, Rosal 11, Flores 9, Besanes 9, Lee 7, Go 6, Conde 4, Tingco 3, O. Go 2
Mang Inasal (80) - Singson 31, Boniel 16, Cabaltera 12, Porras 12, Peña 7, Barreto 2
Ikaduhang duwa:
Sherilin Plastics (87) - Lim 27, Huang 19, Mercado 13, Que 12, Odulio 12, Go 4
AMBL/ACDC (77) - Estella 25, F. Te 19, Sullano 10, Hernandez 8, Balangauan 5, Noel 4, Lim 2, Te 2. – BANAT NEWS