Masolo ang liderato pakay ng Bedans

MANILA, Philippines - Nagmula sa isang two-week vacation, hangad ng three-peat champions San Beda College na masolo ang pangunguna sa pakikipagharap sa tigasing Letran College sa pagba­balik ng aksyon sa 86th NCAA men’s basketball tournament.

Magsasagupa ang Red Lions at ang Knights ngayong alas-4 ng hapon matapos ang salpukan ng Arellano Chiefs at Perpe­tual Altas sa alas-2 sa The Arena sa San Juan.

Kasalukuyang magka­salo sa liderato ang nag­dedepensang San Sebastian Coillege-Recoletos at ang San Beda mula sa mag­katulad nilang 3-0 re­kord kasunod ang Jose Rizal University (3-1), College of St. Benilde (1-0), Mapua (2-1), Letran (1-2), Arellano University (1-3), Emilio Aguinaldo College (0-3) at University of Perpetual Help System Dalta (0-4).

“We’re expecting a tough game,” ani Red Lions head coach Frankie Lim sa kanilang upakan ng karibal na Knights ni Louie Alas na nag-walk out sa third quarter sa kanilang pre-season game ng San Beda.

Aminado si Alas na ma­laki ang bentahe ng ko­ponan ni Lim, muling ipa­parada sina 6-foot-7 American import Sudan Da­niel, 6’5 Dave Marcelo at 6’2 Adler Dela Rosa bukod pa kina Garvo Lanete at Borgie Hermida. 

Nagmula ang Red Lions sa 69-64 panalo kontra Mapua, habang umiskor naman ang Knights ng ma­laking 87-69 tagumpay laban sa Altas noong Hulyo 9.