ANS pasilong sa semis

CEBU, Philippines - Ang reigning Milo Little Olympics national champion Abellana National School (ANS)-Pomeroy nakaambit og lingkoranan sa semifinals sa boys 17-under division sa Treadtel Cup 2010 niadtong Domingo diha sa Aboitiz Sportsfield sa Subangdaku, dakbayan sa Mandaue.

Ang ANS-Pomeroy ni coach Francis Ramirez mibuntog sa PAREF-Springdale, 1-0 aron maharos ang tulo nila ka duwa sa eliminasyon sa bracket A.

Sa laing bahin, ang University of San Carlos (USC) mao sab ang nag-una sa bracket B uban ang duha ka daog ug usa ka draw, samtang ang Sacred Heart School-Ateneo de Cebu maoy nagsunod sa ikaduha bitbit ang usa ka daog ug duha ka draws.

Sa semis, ang ANS-Pomeroy makigsangka sa SHS-Ateneo de Cebu, ug ang USC moharong sa PAREF-Springdale.

Sa pikas bahin, ang USC milangkat sa korona sa girls 17-under dihang ilang gisirohan ang Giuseppe Football Club, 3-0.

Sila si Jessica Knight, Renee Songalia ug Angeli Ruete mao ang naka-goal sa USC.

Ang USC girls team ni Gary Panagsagan gibitoonan sa mga varsity players ug mga sakop sa San Roque Football team.

Ang pagsalmot nila sa maong kompetisyon magsilbeng pagpangandam alang sa ilang title defense sa Mizuno Cup ug sa San Roque Football Festival tournaments sunod bulan.

Sa gubat sa boys 14, ang bisitang Anthony's Football Club sa Negros Oriental Football Association (NORFA) mipasilong sa finals human giharos ang tanan nilang mga duwa. (BANAT NEWS)