CEBU, Philippines - Mokabat ngadto sa P50 mil ang giandam nga ganti sa labing unang Mayor Mike Rama Inter-Barangay Darts League nga mosikad karong Hulyo 23 diha sa Yayoy's Grill and Resto Bar sa Orchids Street sa Brgy. Capitol Site, ning siyudad.
Naila sab nga Cebu City Niños Darts League, ang kalihukan adunay tulo ka kategoriya -- classified 4-man team, open youth singles ug classified doubles.
Makampiyon sa 4-man team event makaangkon og P15,000, ang ikaduha makadawat og P8,000 ug ang ikatulo mobulsa'g P5,000.
Ang makakuha sa ikaupat nga dapit mobitbit og P3,000.
Sa classified doubles, ang kampiyon mobulsa og P4,000, ang second placer makaangkon og P2,000, ang third placer moluklok og P1,400 ug ang fourth placer makadawat og P1,000.
Mopahiluna sa ikalima hangtod sa ikawalo nga dapit hatagan og P300 matag parisan.
Ang top three sa open youth singles makadawat og P2,000, P1,200 ug P800 matag usa. Ang fourth placer mobulsa og P500, samtang ang motapos gikan sa ikalima hangtod sa ikawalo makadawat og P200 matag usa.
Ang torneyo pagaduwaon matag Biyernes sa gabii hangtod sa Septiyembre 25. (BANAT NEWS)