Dragons Rugby sugdan na

CEBU, Philippines - Pormal na nga buksan ang Dragons Rugby Challenge IV nga uloha'g Carmen Copper Corp. Rugby Cup karong adlawa diha sa Cebu International School (CIS) field sa Pit-os, Talamban, ning siyudad.

Ang duwa gikatakdang sugdan sa alas-2:30 sa hapon ug bukas kini sa tanan.

Magsangka sa unang duwa ang Komodos ug ang Chillex Pink Dragons. Sundan sa Cebu Dragons, kinsa makigtigi sa Low Flying Dragons.

Sa pakig-alayon sa Cebu Football Club-Cebu City ug sa Philippine Rugby, ang maong torneyo gipaluyohan sa Carmen Copper Corporation, Gustavian, M. Lhuillier Kwarta Padala, Overgaard Subic Inc., Philinsure ug Chillex group.

Sa Hulyo 31, ang Queen City of the South mo-host sa duwa tali sa bisitang Luzon batok sa Visayas squads. (BANAT NEWS)