Albania handang magtiis para sa tagumpay
MANILA, Philippines - Handang tiisin ni Annie Albania ang kaunti pang nararamdaman sa katawan para mabigyan ng karangalan ang bansa sa gagawing 1st MVP International Boxing Friendship Cup na magsisimula ngayon sa PICC Forum Tent.
Si Albania ay isa sa limang lady boxers ng bansa at patok na mapagharian ang lalaruang 51 kilogram division.
Ito ang lalabas na unang laban ng Asian Indoor Games at Laos SEA Games gold medalist sa taong ito dahil hindi siya sumali sa Asian Women’s Boxing Championships sa Kazakhstan dala ng injury sa kaliwang balikat at lower back.
“Sa ngayon ay okey na ang injury ko sa balikat pero may iniinda pa ako sa lower back. Pero lahat ng injury pagdating sa laban ay hindi ko na iniisip iyan. Basta laban lang ako nang laban,” wika ng tubong South Cotabato na boksingera.
Tatlong boxers lamang ang nakaentrada sa paglalaruang dibisyon ni Albania pero ngayon lamang malalaman ang opisyal na bilang sa draw at weigh-in.
Si International Amateur Boxing Association (AIBA) president Dr. Ching Kuo Wu ang siyang panauhing pandangal sa opening ceremony na itinakda ganap na alas-3 ng hapon.
Makakasama niya sina Asian Boxing Confederation president Chang Jiangping at ASBC executive director Richard Guozheng bukod pa sa Amateur Boxing Association of the Philippines (ABAP) president Ricky Vargas at chairman Manny V. Pangilinan.
- Latest
- Trending
