Cebu Niños mo-host na sa TOP

CEBU, Philippines - Gikaintapang M. Lhuillier Kwarta Padala-Cebu Niños naglaraw na sab nga magmangtas sa ilang pag-host sa 6th leg sa Tournament of the Philippines (TOP) sugod karong adlawa diha sa Cebu Coliseum.

Ang Cebu Niños ni coach Raul 'Yayoy' Alcoseba, kursonada karon nga mosakmit og laing leg title human usab nila nakuha ang kampiyonato sa first leg sa hinugpong torneyo sa PBL-Liga Pilipinas.

Dili hinuon sayon ang tahas sa Cebu Niños tungod kay usa sa mosukod sa ilang abilidad mao ang fifth leg champion Hobe Bihon-Taguig City ni Mayor Laarni Cayetano.

Ang Hobe Bihon-Taguig City, kinsa mipukan sa Ascof Lagundi niadtong Sabado, makigpinaksitay sa Cebu sa main game sa alas-7:20 sa gabii human sa opening ceremony.

Sa pasiunang duwa, ang MisOr Meteors makigtigi batok sa Mandaue Landmasters sa alas-5 sa hapon.

Mangulo sa Niños mao sila si ex-PBA cagers Stephen Padilla, Mark Magsumbol, Marlon Basco, Bruce Dacia ug Warren Ybanez, samtang ang mangu sa Hobe Bihon-Taguig City mao sila si Harold Sta. Cruz, Erick dela Cuesta ug Jemal Vizcara.

Ang   Niños nahimutang karon sa ikaupat nga dapit sa standings nga adunay 15 puntos, nagsunod sa Ascof (24 pts.), Misamis Oriental (22 pts.) ug Laguna (18 pts.).

Kun makampiyon ang Cebu Niños niini nga leg, makabaton kini og laing 15 puntos nga maoy mohatod kanila ngadto sa unang dapit sa standing.   (BANATNEWS)