Si Paul: Ang kugitang psychic

CEBU, Philippines - Ania'y makalingaw nga balita mahitungod sa 2010 World Cup. Mahitungod kini sa usa ka mananag-an. It's a bird? It's a plane? it's Madam Auring? No, it's Paul, an octopus.

Kini si Paul, usa ka kugitang mananag-an ug sa unom ka higayon, wala pa mopaltos ang iyang gipili kung kinsay modaug, ang labing bag-o ang pagtag-an nga Germany maoy mosakmit sa ikatulong pwesto batok sa Uruguay.

Gitag-an ni Paul nga Spain maoy mahimong kampiyon sa 2010 World Cup ug siyempre, wala malipay ang nasud sa Germany kinsa naglagot kaniya dihang iyang gipili ang Spain nga maoy modaug batok Germany sa semifinals, 1-0.

Sa natad sa sports, depende lang kung kinsay imong mapilian---ang uban malipay ug ang uban sab maglagot. Kining kugita nga si Paul nga gi-ila sab nga "Oracle of Oberhausen,” nga tua mahimutang sa Germany. 

Bag-o lang gipili ni Paul ang nasud nga Spain isip maoy mahimong kampiyon sa 2010 World Cup. Ang Spain makigsangka karon batok sa Netherlands sa championship.

Ang nag-alima ni Paul, ang dos anyos ug tunga ka tuig nga kugita nga makita karon sa Oberhausen Sea Life aquarium, nagkanayon nga mohimo lang sa iyang panagna matag adunay duwa sa World Cup ilabi na gyud kung moduwa ang Germany. Apan tungod kay kanunay siyang makatag-an, naka-ani siya'g dungog ug pagtagad sa tibuok kalibotan ug daghan ang mihangyo kaniya nga mopili siya kung kinsay modaug sa finals.

Himoon ni Paul ang iyang pagpanag-an pinaagi sa duha ka transparent nga kahong plastic diin magtangag sa nasudnong bandila sa usa ka nasud. Ang iyang mapilian nga kahon, iyang sudlon pinaagi sa iyang gaway ug kuhaon ang pagkaon sulod niini.

Tungod kay daghan ang naglagot kang Paul ilabi na ang taga Germany nga nakahulga sa iyang kinabuhi, ang animal rights group nga PETA gusto nang buhian si Paul aron dili siya mahinaykan og larang o adobo. 

Matod pa ni Stefan Porwoll, ang manager sa Sea Life aquarium nga mapasigarbohon sila ni Paul tungod sa tukmang pagpanag-an. Human gitag-an ni Paul ang Germany nga maoy mapilde, ang German tv nagpakita og footage sa usa ka grilled octopus. Tungod niini, nakahukom ang Spanish Prime Minister nga si Jose Luis Rodriguez Zapatero nga pabantayan si Paul tungod kay nahimo na siyang inila didto sa Spain sa ngalan nga “El Pulpo Paul,”

“I am concerned about the octopus.” I’m thinking about sending in a team to protect the octopus because obviously it was very spectacular that he should get Spain’s victory right from there,” matod pa ni Zapatero.

Agi'g tubag sa mga masuk-anong emails gikan sa Germany, gipahugtan na ang pagbantay sa aquarium matod pa ni Porwoll.

“I even told our guards and people at the entrance to keep a close look at possible football fans coming after Paul for revenge," matod pa ni Porwoll uban sa pagdugang nga ang mga kalagot nga gipadala sa email nasapawan ra sa pagpadala'g mga mensahe alang sa kabalaka ug mga hangyo alang sa mga panagna.

Apan bisan pa sa pagpanag-an ni Paul, aduna gihapon siya'y karibal ug kini mao ang usa ka Singaporean parrot nga si Mani kinsa mitagna nga ang Dutch (Netherlands) maoy modaug.

Ang taga South Africa nga nagduwa sa Spain nga si Carlos Marchena wala kaayo mohatag og igong gibug-aton sa panagna ni Paul ug nagkanayon "It’s only an octopus.”  – BANAT NEWS