CEBU, Philippines - Bugtong si Nonito "The Filipino Flash" Donaire ra ang milampos sa pag-ani og daog, kini human pulos nangatumba sila si Bernabe Concepcion ug Eden Sonsona sa tagsa-tagsa nila ka mga sangka sa “The Challenge” boxing card kagahapon didto sa Coliseo Jose Miguel Agrelot sa Puerto Rico.
Gamit ang iyang pabor sa gipaspason ug gitas-on gipabahaan ni Donaire og mga mahait nga uppercut ug hooks ang Mehikanong si Hernan Marquez aron madepensaan ang iyang WBA interim super flyweight title.
Mga makabungog nga kombinasyon ang sunod-sunod nga gibuhian ni Donaire ngadto ni Marquez kinsa mipakita usab sa iyang kalig-on, apan mitiurok kini atol sa round 8 human makatilaw sa bangis nga counter-left hook sa suwang gikan ni Donaire.
Apan di sama ni Donaire, lahi nga kapalaran ang natagamtaman ni Concepcion dihang gipahayang siya ni Puerto Rican Juan Manuel Lopez sa ikaduhang round sa ilang WBO featherweight title bout.
Makalilisang sinukmagay tali sa duha ka protagonista sa first round. Unang miiskor og knock-out si Lopez sa pagbagting sa kampanilya, apan wala usab magpaulahi si Concepcion dihang mibawus siya pagpatumba sa kampiyon sa naghinapos nga segundos sa maong round.
Mipatigbabaw ang kusug sa Puerto Rican sa misunod nga round human niya gipatumba sa makaduha ka higayun si Concepcion kinsa wala na makahimo pa pagbarug dihang giiphan na kini sa referee sa oras nga 2:37 sa second round.
Nasugamak usab ang kababayan ni Manny Pacquiao nga si Eden Sonsona dihang wala na kini makabangun human naigo sa right straight ni Puerto Rican Jonathan Oquendo sa round 8 sa ilang bantamweight bout. – BANAT NEWS