CEBU, Philippines - Mohimo pa og usa ka "exhibition match" si kanhi WBO Asia-Pacific bantamweight champion Rey 'Boom Boom' Bautista didto sa Bohol isip kabahin sa iyang pagpangandam alang sa iyang umaabot nga away karong Agosto 28, 2010 diha sa Waterfront Cebu City Hotel and Casino sa Lahug, ning siyudad.
Isip kabahin sa gipasiugdahan sa ALA Promotions ug sa ABS-CBN Sports nga "Sandugo - Labanan ng mga Kampeon" didto sa Tagbilaran City, Bohol karong Hulyo 17, si Bautista gikatakdang mopakita sa iyang katakus sa tulo ka hugna nga exhibition match batok ni OPBF title challenger Fernando Otic sa Cebu didto sa Carlos P. Garcia Sports Complex.
Human maalim ang iyang wrist injury, si Bautista midaog sa duha ka sunod-sunod niya ka away batok ni Marangin Marbun sa Indonesia alang sa interim WBC International featherweight title pinaagi sa 7th round TKO ug 6th round KO nga kadaugan batok ni Saichon Sotornpitak sa Thailand didto sa The Lodge sa Chi Garden, Dubai, United Arab Emirates.
Bisan og usa lang kini ka exhibition match, makalaum ang mga Bol-anon nga usa ka init nga sinukliay sa kumo ang masaksihan tali ni Bautista ug sa beteranong si Otic. Si Otic nangandam usab sa iyang sangka batok ni OPBF titlist Satoshi Hosono didto sa Japan. (BANATNEWS)