San Roque Football Club kampiyon sa 1st Treadtel Cup 2010

CEBU, Philippines - Giangkon sa San Roque Football Club (SRFC) ang inaugural championship title sa Players 8 division sa 1st Treadtel Cup 2010 kagahapon diha sa Aboitiz Sportsfield sa Subangdaku, Mandaue City.

Gisirohan sa SRFC ni coach Tata Colina ang lig-on sab nga Canduman Football Club 1 nga gipaluyohan sa M. Lhuillier, 2-0 sa finals.

Naka-iskor og goals sa SRFC mao sila si Michael Ybañez ug John Mark Busa, kinsa nakakuha sab og suporta gikan nilang Cyril Ybañez, Nathaniel Colina, Nathan Bajarias ug Harold Sebillo.

Sa kumbati sa Boys 12, ang PAREF Springdale ni coach Mario Ceniza mipalig-on sa ilang kampanya alang sa titulo dihang nagpabilin kining way pilde sa elimination round phase uban ang 4-0 nga baraha.

Ang Springdale mipukan sa Villa del Rio, ML Canduman FC ug Sacred Heart School-Ateneo de Cebu, nga parehong adunay 3-0 nga baraha.

Sa sayo pa, ang batan-ong Springdale booters mibuntog sa Giuseppe FC alang sa limpiyo nila nga baraha, 7-0.

Sangkaon sunod sa Springdale mao ang walay daog-daog nga University of San Carlos (USC)-North Campus.

Bisan pa' mapilde ang Springdale, otomatik na silang mo-okupar sa kinatas-ang dapit ug ilang banggaon ang fourth-ranked team alang sa cross-over semifinals karong adlawa.

Gipasiugdahan sa Cebu Football Association, ang duha ka weekend nga torneyo gipaluyohan sa Treadtel Tires. (BANATNEWS)