Violet daog gihapon sa Yellow sa Sunday Club caging

CEBU, Philippines - Gipamatud-an sa Violet team nga mas maayo pa sila sa Yellow team dihang ila na usab nga gipilde ang naulahi, 106-95 sa Camella Homes Phase 3 Sunday Club basketball tournament niadtong Domingo didto sa Villa Magallanes gym sa Sta. Lucia Property, dakbayan sa Lapu-Lapu. Sayo kaayo mipabuhagay sa ilang kainit ang Violet ug miposte kini'g 10 puntos nga bentaha sa first period, 26-16.  Sa kombinasyon nilang Centes Brañanola, Rolly Dela Pieza ug Dodong Dela Pieza, mitubo og taga-liog ang labaw sa Violet sa halftime, 60-36 nga naghatag kanila'g kasiguroan sa ilang kadaugan. Si Brañanola maoy topscorer sa Violet nga mitanom og 27 puntos, gisundan ni Rolly Dela Pieza, kinsa miabuno'g 14 puntos. Si Dodong Dela Pieza mipupo og 17 puntos, samtang si Ramil Cortes miani og 12 puntos alang sa maong kadaugan. Bugtong konsolasyon sa Yellow team nga naghangak og ginukod mao ang pagkitkit sa dakung labaw ngadto na lang sa 11 puntos human sa regulasyon. Si Amay Palad mirehistro og career-high 40 puntos aron pangulohan ang Yellow team, samtang si Alan Sepe mitimang og 35 puntos. Sa laing aksiyon, ang Rollway Freights mitunol og laing kapildihan ngadto sa Rylle Trucking sa ilang kulbahinam nga duwa, 92-91. Dumadaog unta ang Rylle Trucking dihang mi-abante kini og dos puntos sa nahabiling sayes segundos, 91-89, apan si Allen Dinola walay pupanagana nga mi-lay-up ug nakakubit pa og foul dayong kapupos sa oras sa duwa. Ang three-point play ni Dinola maoy nagduso sa Rollway ngadto sa kadaugan. Si Dinola mihabwa og 22 puntos, apan si Alvin Ocon maoy nangulo sa Rollway nga adunay 23 puntos, samtang si Reynir Dela Pieza miariya'g 11 puntos. Ang naparot nga Rylle Trucking gipangulohan ni Wendel delos Angeles nga mihandos og 23 puntos, samtang si Glenn Catampatan miduso og 16 puntos.

PUNTOS MATAG USA

Unang duwa:

VIOLET (106) - Brañanola 27, D. Dela Pieza 17, R. Dela Pieza 14, Cortes 12, Aparente 8, Plenos 7, Balberona 6, Almacin 6, Fedillaga 4, Vega 3, Braza 1

YELLOW (95) - Palad 40, Sepe 35, Geraldez 5, Maratas 4, Tabaña 4, Sumilang 4, Rodriguez 2, Villapez 1

Ikaduhang duwa:

ROLLWAY FREIGHTS (92) - Ocon 23, Dinola 22, R. Dela Pieza 11, Omega 8, Micabata 7, Abel 4, Baral 4, Andrino 3 Ompad 3, Olloves 1RYLLE TRUCKING (91) - Delos Angeles 23, Centes 21, Catampatan 16, Oyanib 8, Delan 8, Delgado 4, Anto 4, Reguen 4, Sanchez 2, Dela Pieza 2, Flores 2, Ompad 2 (BANATSPORT)