CEBU, Philippines - Gibanatan sa All Star A cagers ang All Star B, 79-61 aron pagsakmit sa titulo sa 6th Inter-BPO All-Star Game niadtong miaging adlaw diha sa City Sports Club-Cebu gym sa Cebu Business Park.
Hugot nga duwa ang gipakita sa duha ka koponan sa unang kuwarter nga miresulta sa panagtabla, 18-all.
Hinuon, ang All Star A mihimo'g kausaban sunod hugna aron pagposte'g singko puntos nga bentaha sa halftime, 37-32.
Bisan pa sa maong bentaha, ang All Star A wala mokompiyansa ug padayong miugkat pinaagi sa ilang 13-0 run aron inaton ang labaw ngadto na sa 60-47.
Tungod sa kalawom sa lubong, ang All Star B wala na makasikit pa hinungdan nga gipahamtangan kini og 18 puntos nga kapildihan.
Si Glenn Mangubat sa Qualfon mao ang nangulo sa All Star A pinaagi sa iyang 16 puntos nga igo na kaayo alang kaniya nga tahurong All Star MVP, samtang si Arnold Esteban (Convergys) ug Reinario Salibay (Wipro) nagkumboya'g 25 puntos.
Ang pilderong All Star B, gipangulohan ni Mark Gellez sa Calltex nga mirehistro og game high 23 puntos, gisundan ni Dennis Poquita sa Western Wats nga misapsap og 12 puntos.
Sa laing bahin, si Kristian Tapic sa defending champion Convergys milangkat sa three-point shootout title human mipatigbabaw sa ilang siyam ka mga karibal.
Si Tapic mao sab ang topscorer pinaagi sa iyang 13 puntos, samtang si Jopher Regidor sa Qualfon miabuno'g 10 puntos ug si Mark Rabuya sa Aegis People Support adunay siyete puntos.
Sila si Regidor ug Billy Requillo sa Qualfon milangkat sa two-ball title uban ang 39 puntos human nila gipilde og usa ka punto ang tandem nilang Joshua Permacio ug Xyruz Paguia sa Accenture. Sila si Siegfred Ofonda ug Jake Pia sa Lexmark mi-okupar sa ikatulo nga dapit sa ilang 25 puntos.
Sa free throw shoot-out, si John Casesna sa Aegis People Support mao ang naghari pinaagi sa pagpilde nilang Requillo ug Paguia nga napunta sa ikaduha ug ikatulo nga dapit.
PUNTOS MATAG USA
ALL STAR A (79) - G. Mangubat 16, Esteban 14, Salibay 11, Ochate 8, Pajo 8, Regidor 8, R. Mangubat 6, Amit 4, Mancao All Star B (61) - M. Gellez 23, Poquita 12, Mendez 9, Lago 6, Silagan 6, Arrieta 5 (BANATNEWS)