CEBU, Philippines - Musaka pagbalik ibabaw sa ring ang Sugbuanong si Randy “Komong Bato” Suico aron panalipdan ang iyang Oriental and Pacific Boxing Federation (OPBF) light welterweight title batok sa Hapon nga si Motoki Sasaki karong Hulyo 20 didto sa Korakuen Hall sa Japan.
Si Suico (29W-5L-1D, 25 KO’s) midaog sa maong bakanteng titulo niadtong Mayo pinaagi sa fifth round TKO batok ni Kyung-Suk Kwak sa South Korea.
Ang 30-anyos nga si Suico uban sa iyang trainer nga si Juanito Ablaca mibisita didto sa nabantog nga ALA Gym aron mopahigayun og sparring sessions batok sa mga ALA Boys nga sila si Jason Pagara ug James Bacon.
Samtang ang 34-anyos nga si Sasaki (33W-8L-1D, 21 KO’s) midaog usab sa OPBF welterweight niadtong tuig 2008 batok sa Ilonggo nga si Rev Santillan pinaagi sa 6th round TKO. Gawas ni Santillan, gipukan usab sa Hapon ang laing Pinoy nga si Dexter Delada via 7th round technical decision. - Lemuel P. Maglinte gikan sa Philboxing (BANAT NEWS)