THREE-nauguration

CEBU, Philippines - Tulo ka inila ug respetadong politiko nga may apelyidong MATUGAS mao karo’y nagkupot sa renda sa pangagamhanan sa lalawigan sa Surigao del Norte, sakop sa CARAGA Region.

Tulo ka Matugas, tulo ka maayong lider nga usa ra ang tumong— ang pagpalambo sa Surigao del Norte ubos sa ilang hiniusang kawsa “Bag-ong Surigao” usa ka kampanya nga mag-usab sa politikanhong sistema sa nahisgotang lugar ingon man ang paghatag og maayong kaugmaon sa tanang mga molupyo didto.

Una, mao ang bag-ong napili nga si Gov. Sol F. Matugas, ikaduha mao si Congressman Francisco “Lalo” Matugas sa 1st District kinsa maoy kapikas sa gobernador ug iyang bayaw nga si Engr. Ernesto “Nitoy” Matugas, ang bag-ong napiling mayor sa dakbayan sa Surigao.

Usa ako sa palarang sakop sa media dinhi sa Sugbo nga nakatambong sa pagpanumpa ni Gob. Matugas, ang labing unang babaye nga gobernador sa maong lalawigan nga adunahan kaayo kung maghisgot kita’g mineral resources diin nahisakop sab ang Siargao island, ang gitawag ug Surfing Capital sa Pilipinas. Tungod kay duol sa Pacific Ocean ang Surigao, mga dagkong bawud ang mihatag ug kaanindot sa maong lugar.

Si Gob. Sol kinsa kanhi regional director sa Department of Education (DepED) didto sa Region 8, maoy asawa ni Cong. Matugas nga kanhi mao sab ang gobernador. Usa ka inilang politiko nga sakop sa pundok ni Matugas mao si Cong. Guillermo A. Romarate nga anaa na sa iyang ikaduhang termino susama kang Cong. Matugas.

Haum si Romarate sa ilang pundok kay siya adunay lig-on nga baruganan ug dili daling mahulga. Siya maoy naghupot sa Surigao City ug 11 ka lungsod sa mainland Surigao nga naglangkub sa 2nd District diin nakakuha’g dakung boto ang mga Matugas aron pagpukan sa kanhi pamunoan ubos sa mga bansagong Barbers.

Nanumpa sa katungdanan ang mga Matugas ug si Cong. Romarate kaniadtong Hunyo 30 didto sa multi-million nga Surigao del Norte Sports Complex. Lakip sa nanumpa mao ang bise-gobernador nga si Atty. Arturo Calos Egay Jr. ug mga sakop sa Provincial Board nga sila si Mamerto Galanida, Simeon Vicente Castrence, Cesar Bagundol, Margarito Longos ug Edgar Andanar sa 1st District ug Myrna Romarate, Fernando Larong, Leonilo Aldonza, Regina Alaan ug Victor Borja sa 2nd District.

Sa pagkapili ni Gobernador Matugas isip inahan sa lalawigan, walay laing gilauman ang mga Surigaonon kung dili ang kausaban, kalamboan ug kaayohan sa tanan sa walay pagpinig kabus man o adunahan.

Ilakip nako sa pagpasalamat sa akong tulo ka adlaw nga pagpuyo didto sa Surigao City si Bingo Matugas, anak ni Cong. Lalo ug Gob. Sol ug pang-umangkon ni Mayor Nitoy. Si Bingo maoy collector diha sa Mactan Cebu International Airport Authority (MCIAA) ug nagkaila kami tungod sa basketball.

Dili sab nako kalimtan ug pasalamat ang akong higala nga si Romeo Cal, ang bag-ong natudlo nga Provincial Administrator sa maong lalawigan.

Matud pa sa pinulongang Surigaonon, ang pundok ni Matugas nagkanayon “ Duyom nan Pasalamat” Mabuhay Surigao del Norte.

Miscellaneous. Best wishes to my beautiful niece Abigail “Apple” Malagar who is turning a year older today. My sincere congratulations to the newly-elected and appointed officials of the Knights of Columbus San Roque Mambaling Council No. 10099. They are Grand Knight Bro. John Montecalvo, Deputy GK Bro. James Artiaga, Chancellor Bro. Eddie Abellana, Researcher Bro. Art Lopez, Treasurer Bro. John Villeno, Advocate Bro. Rosendo Alfajardo, Warden Bro. Sofronio Gador, Inside Guard Bro. Francisco Andong, Outside Guard Bro. Danny Ylaya and Trustee Bro. Dodong Fiel. In the name of Christ, good luck brothers Knights. – BANAT NEWS