Delos Santos, Losiaboi midominar

CEBU, Philippines - Lab-as pa sa malampuson niyang international marathon debut, misakmit na usab og laing titulo si Mary Grace Delos Santos human siya mikampiyon sa 12-k women’s open sa 2010 Fitness Run kagahapon diha sa The Terraces sa Ayala Center-Cebu.

Wa pa gani mahuwasi sa makutas niya nga kampaniya sa half-marathon sa Kuala Lumpur Run diin mipahiluna sa ikaduhang dapit, nag-una na usab si Delos Santos kinsa maoy labing unang female runner nga milabang sa finish line sa oras nga 45:37.98.

Ang garbo sa Southwestern University (SWU) nga si Mary Joy Tabal mipwesto sa ikaduha sa oras nga 49:58.47, samtang ang beteranang si Madelyn Carter maoy third placer sa oras nga 50:30.

Sama sa giatangan sa kadaghanan, ang Kenyan Missionary nga si Simon Losiaboi maoy labing paspas sa men’s open sa oras nga 40:15.85, gisundan ni Reiz Enriquez sa ikaduhang dapit sa oras nga 40:46.60. Si Adonis Singson milampos pagkuha sa ikatulong luna sa oras nga 41:03.27.

Gidominaran ni Joery Lee ug Jobert Carolino ang tagsa-tagsa nila ka dibisyon sa 6k Open. Si Lee mitapos sa lumba sa oras nga 24:00.84 batok nila ni Crisel Diongson’s (24:52.05) ug Merlyn Alin (25:15.53) nga maoy runner-ups sa women’s class.

Sa iyang bahin, si Carolino (19:49.53) uban nila ni Rolando Batian (21:01.00) ug Charlie Berberio (21:18.56) maoy top-three finisher sa men’s division.

Nanghawod sa 3k Open sila si Jorry Ycong (8:20.53) sa men’s class ug si Clarisse Diongson (10:36.41) sa women’s open. – BANAT NEWS