CEBU, Philippines - Sa ikaduhang higayon uban ang ilang kalagsik ug teamwork, ang Misamis Oriental mipilde na sab sa ANI-FCA sa iskor nga, 88-66, aron paghari sa 4th leg sa Tournament of the Philippines (TOP) niadtong miaging gabii didto sa Mandaue City Cultural and Sports Complex.
Ang kanhi bitoon sa Letran nga si Mark Andaya nakapadugan og puwersa sa star-studded squad ni coach Jun Noel diin ang Meteors mikompleto pagsilhig sa upat ka duwa sa maong torneyo nga gipasiugdahan sa Philippine Basketball League ug Liga Pilipinas.
Sa maong kadaugan, ang Meteors ni Gov. Oscar Moreno nakakuha'g 15 puntos alang sa kinatibuk-ang 22 puntos, nga naghatag kanila'g dugang paglaom nga malandig sa top-four inig human sa elimination round nga gipaluyohan sa Air21, Molten, Ascof Lagundi, Agrinurture, Treston College, Burlington ug Basketball TV.
Sa laing bahin, ang MP Warriors maoy miangkon sa ikatulo human nila gilubong ang host-Mandaue Landmasters pinaagi sa overtime sa iskor nga 87-74.
Si 6-foot-7 Andaya nagmangtas sa ilawom dihang nihungit kini og 12 puntos uban ang upat ka blocks sa unang- tunga nga igo na kaayo sa pagpaluya sa Cultivators, kinsa nikumbati nga wala ang ilang head coach nga si Arsenio Dysanco.
Si kanhi UAAP star Patrick Cabahug miamot og 12 puntos, samtang sila si Neil Raneses ug Eder Saldua nagkumboya'g 21 puntos. Si Raneses maoy napiling MVP sa maong torneyo. (BANATNEWS)