Na-pari kadiyot

Bisa'g ulitawo pa tang daku ug wala na intawon amahan, mabulokon gihapon para nako ang selebrasyon sa Father's Day niadtong Domingo. Kini gumikan sa duha ka mahinungdanong hitabo nga akong nasinati sa maong espesyal nga adlaw sa mga amahan.

Una, wala ko magdahom nga akong igkauban sa maong adlaw si boxing superstar Manny Pacquiao ug ang maanyag niyang kapikas nga si Jinkee. Sekreto ang maong pagbisita ni Pacman ug gani unom ra kami ka buok nga gitugotan nga makasud sa iyang suite sa Waterfront Hotel diha sa Lahug. Mao kadto ang labing unang pagbisita ni Pacman sa Sugbu sukad siya napili pagka-kongresista sa probinsiya sa Saranggani.

Gumikan kay nagdali man sab si Pacquiao aron maka-apas sa iyang flight sa alas-5 sa hapon, hamubo ra kaayo ang among panag-istorya. Human miposing uban sa iyang mga higala nga si Rex 'Wakee' Salud ug Jingjing Rama nga miregalo kaniya og mahalon nga painting, mibuhi kanako og mabug-at nga pamahayag si Pacman. Dili mahinayon ang gi-atngan nga away nilang Floyd Mayweather, Jr. kun dili 50/50 ang pagbinahinay sa premyo.

* * *

Wala damha ug sekondarya lamang kadto ang among paghimamat ni Pacman kay ang gisayohan nako'g mata niadtong Domingo mao man ang pagtambong sa bunyag ni John Zaccaheus Rosemeo, anak sa akong higala nga si Paul Alelu Q. Flores ug sa pinangga niyang kapikas nga si Leizl.

Alas-9 sa buntag ang iskedyul sa ispesyal nga bunyag ug sa akong naandan sayo kong mitunga didto sa Sacred Heart Parish. Gumikan lagi kay wala pa may tawo ang kapilya, nagbarog-barog ko sa gawas samtang gika-istorya nako ang guwardiya.

Taud-taud dunay awto nga mi-abot, mi-park dayong guwa sa usa ka maanyag ug seksing babaye. Dali siyang miadto sa pikas pultahan sa awto dayong kuha ug kugos sa usa ka mahimsug nga bata. Niadtong puntoha, nakahuna-huna ko'g duol sa maong babaye aron mangutana kun kadtong bataa mao ba ang anak ni Bay Alelu nga bunyaganan.

Apan naunsang pagka-unsaa nga paglitok pa lang gani nako og Maam, misangpit man hinuon siya nako og "Ay, Pader" dayong kuha sa tuo nakong kamot aron unta siya mo-amen. Dali hinuon kaayo kong mipasabot nga Maam dili ako maoy pari, usa ko sa mangugos niining bataa dayon namong pangatawang duha. Didto na mi nagka-ilaila ug akong nasayran nga si Kumareng Leizl diay tong bayhana. Mare, may gani wala ko misilaob nga napagan ko nimong pare.Hehehe.

* * *

Bisan sa kamubo sa panahon, sayod ko nga dili mahikalimtan ni Pareng Alelu ang maong adlaw diin nahimong usa ka hingpit nga Kristiyano ang iyang Baby Zach. Labaw na nga milupad gyud dinhi gikan sa Manila ang duha niya ka suod nga higala ug mga bitoon sa PBA nga sila si Arwind Santos ug Denok Miranda, pulos anaa sa kampo sa San Miguel Beer.

Sa mga wala masayod, teammate ni Alelu Flores silang Santos ug Miranda sa dihang nagduwa pa sila sa Far Eastern University (FEU) Tamaraws sa UAAP. Si Santos nakapugnit og duha ka regular season MVP award, usa ka Finals MVP award ug mituboy sa Tamaraws ngadto sa grandslam feat sa UAAP (2003-2005). Tipik nianang naglagiting nga kalampusan si Flores.

Busa mapasigarbuhon kaayo ko nga ibandiwag nga ako silang mga kumpare. Atol sa engrandeng reception sa Grand Convention Center of Cebu, gi-awhag ang tanang "Ninong" ug "Ninang" pagbatbat og matam-is nga pulong alang ni Baby Zach. Gibati ko'g kaulaw niadtong tungora mao nang wala ko kapadangat og mensahe. Mao nang dinhi na lang ning akong lindog akong ipadangat ang akong buot i-ambit ngadto ni Baby Zach.

"As you enter the threshold of Christian world, may you grow a loving, obedient and God-fearing child under the tender caress of your doting parents with the Lord Almighty be always upon your side."

* * *

Kun dunay mga komentaryo o reaksiyon, mahimong mo-email sa [email protected]   – BANAT NEWS