7-7 NBA player Manute Bol mipanaw na

CEBU, Philippines - Si Manute Bol, ang niwang nga 7-7 shotblocker sa NBA gikan sa nasud sa Sudan, Africa ug kanhi ex-pro sulod sa 10 ka tuig, mipanaw na kaniadtong Sabado sa edad 47.

Si Bol, migahin og taas kaayong panahon alang sa usa ka humanitarian nga kalihokan didto sa Africa. Namatay siya didto sa University of Virginia Hospital sa Charlottesville diin siya gitambalan sa usa ka grabeng sakit sa kidney ug talagsaong sakit sa panit sumala pa ni Tom Prichard, ang executive director sa grupong Sudan Sunrise.

“Sudan and the world have lost a hero and an example for all of us. Manute, we’ll miss you. Our prayers and best wishes go out to all his family, and all who mourn his loss,” matud pa ni Prichard.

Si Bol miduwa sa NBA sa lain-laing teams sama pananglit sa Washington, Golden State, Philadelphia ug Miami ug nag-average siya’g 2.6 puntos, 4.2 rebounds ug 3.3 blocks sa iyang career. Siya maoy nangu sa NBA sa blocks sa 1985-86 season samtang nagduwa siya didto sa Washington (5.0 per game) ug kaniadtong 1988-89 season didto sa Golden State (4.3 a game).

Matud pa sa presidente ug general manager sa 76ers nga si Ed Stefanski, “Manute’s impact on this city, our franchise and the game of basketball cannot be put into words. ” Midugang si Stefanski “He … was continually giving of himself through his generosity and humanitarian efforts in order to make the world around him a much better place, for which he will always be remembered.”

Miduwa si Bol sa NBA didto sa Washington sa 1985 diin nakaduwa siya’g tulo ka seasons sa maong team. Mibalik siya’g kadiyot sa Washington dihang hapit na matapos ang iyang basketball career.

Ang Wizards midayeg kang Bol isip usa ka “true humanitarian and an ambassador for the sport of basketball.”  – BANAT NEWS