CV napunta sa ikaupat sa NIA volleyball tourney
CEBU, Philippines - Human nila giharos ang elimination rounds, ang Central Visayas volleybelles gisuklian sab og duha ka sunod-sunod nga kapildihan sa semifinals ug mipahiluna na lang ngadto sa ikaupat nga dapit sa National Irrigation Administration (NIA) volleyball tournament kagahapon didto sa NIA volleyball courts sa Quezon City.
Sa crossover semis, ang CV miyukbo ngadto sa Ilocos Region sa duha ka sets, 25-20, 25-21.
Ang CV nga gipangulohan ni RP team member Jusabelle Brillo, kanhi Nestea Fit beach volley champs Erika Camille Verano ug Apple Eve Saraum, uban nilang Joreen Sanchez, nasugamak sab ngadto sa Upper Pampanga, 25-19, 25-20 alang sa ikatulong dapit.
Sa laing bahin, ang Western Visayas mao ang milangkat sa kampiyonato human gipilde ang Ilocos Region, 25-23, 25-22. – BANAT NEWS
- Latest
- Trending
