Sugbu nasaytang binyu sa Ironman Race

CEBU, Philippines - Bukas sa ideya nga mo-host sa “Ironman” race ang mga Cebuano sports organizers human usab sa malampusong pagpahigayon sa sunod-sunod   ka mga dagkung sports events dinhi sa Sugbu, usa na niini ang Cebu City Marathon.

Atol sa pagbukas sa Bikefest didto sa Active Zone sa Ayala Center-Cebu, si Pearl Jacalan, usa sa mga tigpasiugda sa Cebu City Marathon mibutyag nga daghan na nga tawag gikan sa mga sports enthusiasts gikan sa Manila nga midasig kanila nga mo-host sa “Ironman” dinhi sa Sugbu.

Hinuon, si Jacalan nagkanayon nga dili basta-basta ang pag-host sa “Ironman” nga maoy labing dakung triathlon race sa nasud tungod kay nanginahanglan kini'g dakung salapi ug taas nga panahon sa pagpangandam.

Sa pagka karon, padayon ang kalihukan sa mga Cebuano organizer aron mas mapalambo ang sports dinhi sa Sugbu ug usa na niini ang   Bikefest nga gipasiugdahan sa R.O.X ug Bike4U Foundation.

Si Meyrick Jacalan sa Bike4U, miingon nga gawas sa pag-promote sa mga bag-ong modelo sa mga bisiklita, tumong usab sa tulo ka adlaw nga kalihukan mao ang pagpalambo pa sa cycling dinhi sa Sugbu.

Kagahapon gi-display ang mga mahalon ug labing init nga modelo sa mountainbike ug roadbike. Karong adlawa adunay ipahigayon nga bike clinic diin usa sa mga mo-facilitate mao si international biking patron Jens Funk ug James Montecillo sa YKK.

Motapos sa   Bikefest mao ang “Bike Out” nga salmotan sa kapin sa 300 riders nga motuyok sa rota nga adunay gilay-on nga 16 kilometro. Manukad kini diha sa Active Zone, atbang sa Starbucks Coffee. – BANAT NEWS