Adlaw sa paghukom

CEBU, Philippines - Aduna nay koronahan nga kampiyon sa 2010 NBA Finals karong adlawa human sa kulbahinam nga duwa tali sa defending champion Los Angeles Lakers ug Boston Celtics.

Sa managsamang 3-3 win-loss records sa "best-of-seven" championship series, ang tanang pabor tua na karon mobalitok sa Lakers ilabi na kay ang Game-7 adto himuon sa Staples Center ug atubangan sa ilang homecourt crowd, mas mosamot kataas ang moral ug kadasig sa mga hugyaw sa ilang fans.

Mitidlom ang kahigayonan sa Celtics nga modaog tungod sa pagka piang sa ilang starting center   Kendrick Perkins, apan sa akong tan-aw, dili kaayo kini makaapekto'g dako kay mas maayo og si Glenn 'Big Baby' Davis maoy ipuli isip starting center kay duha ang iyang mahimo -- pag-iskor ug pag-rebound. Ug aron sab magkadungan sila si Rasheed Wallace ug Michael Finley gikan sa bench.

Unsa man butanga ang kumon nilang duha ni Wallace ug Finley ug unsa man ang ilang ikatabang sa Celtics? Pareho silang beterano ug adunay championship rings tungod kay si Wallace kanhi sakop sa 2004 Detroit Pistons ug si Finley kanhi sakop sa 2007 San Antonio Spurs.

Adunay tulo ka puntos nga himuon ang Lakers aron pagseguro sa ilang kadaugan. Una, mo-iskor og daghan si Kobe Bryant, ikaduha, adunay suporta gikan nilang Pau Gasol o mahimong gikan kang Ron Artest o Derek Fisher ug ikatulo, mobahog ang ilang bench sama sa Game-6 diin ilang napuhalan ang mas lawom nga bench sa Celtics.

Sa habig sa Celtics, depensa maoy labing kusog nga alas nga angay nilang idiga karong adlawa. Tulo sab ka butang ang ilang himuon aron sila molampos.

Una, kinahanglan nga mo-deliver pag-ayo sila si Paul Pierce ug Ray Allen ug mo-iskor sila’g labing menos 25-30 puntos matag usa. Ikaduha, kinahanglan modepensa pag-ayo si Kevin Garnett tungod kay dili ang iyang puntos maoy yawi sa kadaugan kun dili ang iyang hugot nga depensa tungod sa kataas sa iyang kasway ug taas-taas nga kasinatian. Ug ang ikatulo, maka-double figures si Rajon Rondo sa rebounds o assists ug mas labi pa gyung maayo kun makahimo siya’g triple-double.

Walay bisan usa ka coach sa tibuok kalibotan nga dili motuo nga depensa maoy makapadaog sa duwa. Sa panultion pa:   “defense is the best offense.” Ug matud pa usab “offense can win games, defense can win championships.”

Busa, ngadto sa Lakers ug Celtics, good luck ug “may the best team wins.” - BANAT NEWS