Mepranum napakyas pagsakmit sa world title

CEBU, Philippines - Idlas ang katumanan sa damgo nga mamahimong world champion alang ni Richie Mepranum kini human siya gipatumba sa Mehikanong si Julio Cesar Miranda sa round five sa ilang sangka alang sa bakanteng WBO flyweight title kagahapon didto sa Centro de Convenciones sa Puebla, Mexico.

Mipakita og kaisug ang lumad nga taga-Sarangani Province nga si Mepranum, apan mas mipatigbabaw ang kasinatian sa beteranong si Miranda kinsa mitumba sa Pinoy sa round four ug round five nga maoy nakapaaghat sa referee nga ihunong ang away.

Wala usab musalir ang counter-punching ni Mepranum tungod sa gipakitang ka-agresibo ni Miranda kinsa milampos na karon pagsakmit og world title human sa iyang kapakyasan batok sa Afrikanong si Moruti Mthalane niadtong Nobiyembre 20, 2009.

Sa maong kadaugan si Miranda mipalambo sa iyang rekord ngadto sa 32-5-1, samtang si Mepranum nakahiagum sa ikaduha niyang pilde sa iyang karera uban ang 22 ka daog. – BANAT NEWS