10th DyAB Kapamilya Run moulbo na karon

CEBU, Philippines - Mosikad na sayo ning buntaga ang 10th DyAB Kapamilya Run diha sa Asia Town I.T Park sa Brgy. Apas, ning siyudad.

Mao na ni ang panahon    sa ubang mga runners nga mosakmit sa titulo sa 15K Open gumikan kay si Kenyan Simon Losiaboi ug Mary Grace delos Santos dili modagan karong adlawa.

Sama ni Losiaboi, dili usab modagan si Mendel Lopez, kinsa   atua na karon sa kaulohan nga nag-review alang sa Geodetic Engineering board exam.

Tungod niini, ang nahabiling contender alang sa men's open mao na lang sila si Elmer Bartolo, John Dueñas ug Joebert Carolino.

Sa pikas bahin, ang   produkto sa Southwestern University (SWU) nga si Mary Joy Tabal ug Madelyn Carter maoy magribal sa korona sa women's division.

Dul-an sa 1,800 runners ang modagan karon sa Kapamilya Run sa 15K, 7K ug 1.5K fun run divisions.

Ganting salapi ug medalya ang nagpaabot alang sa top three finishers sa matag dibisyon.

Gipasiugdahan sa ABS-CBN ug DyAB, ang maong lumba magsilbe usab nga fund raising campaign alang sa   pagpaayo sa mga nagusbat nga classrooms sa mga pampublikong eskuylahan dinhi sa Sugbu. (BANATNEWS)