Sidebar / NBA finals

CEBU, Philippines - Niining 2-3-2 format sa finals, ang LA Lakers maoy nakakuha sa homecourt advantage ug karong tuiga, sila na sab ang migawas nga inilog sa finals. Gani, kaniadtong tuig 2008 ang Lakers man gihapon ang inilog bisan og ang Boston Celtics maoy adunay homecourt advantage niadto nga season diin midaug sa ilang ika-17 nga korona sa NBA ang Celtics.

Upat tanan ka duwa ang adto ipahigayon sa Staples Center, ang korte sa Lakers (57-25) ug tulo lang ang sa Celtics (50-32) apan sagunson ang maong tulo ka duwa didto sa TD Garden.

Lisod pildehon ang Lakers sa ilang homecourt apan kanunay kining na-pruyba sa Celtics nga sila maoy best road team. Kinahanglan silang modaug bisan asa nianing mga duwaa--Games 1 ug 2 o di ba hinoon sa Games 6 ug 7 aron mahimong kampiyon.

Dinha sa NBA, ang tanan posible. Gani ang no. 1 team Cleveland Cavaliers ug no. 2 team Orlando Magic yano mang gipukan sa Celtics didto sa ilang homecourt. Ang mopadaug sa Lakers ang opensa nilang Kobe Bryant, Pau Gasol ug Derek Fisher ug depensa nilang Andrew Bynum, Ron Artest ug Lamar Odom.

Sa samang paagi, ang mopadaug sa Celtics mao ang depensa nilang Kevin Garnett, Rasheed Wallace ug Kendrick Perkins ug opensa nilang Paul Pierce, Ray Allen ug ni triple-double expert Rajon Rondo.

Ania ang pangagpas sa Sportsgab sa duwa.

Game 1--- Tungod kay ang Lakers man maoy host sa unang duwa, ato nang daan ihatag ang daug ug mahimong dako og biya kung dili sila makapiog kang Bryant ug yano kining mo-iskor og 30-35 puntos. Busa, walay duda modaug ang Lakers labing dako 10 puntos.

Game 2--- Bisan og adto gihapon kini duwaon sa korte sa Lakers, makaseguro ako nga mohimo'g adjustments ang Celtics ug pugngan si Bryant aron dili na makapatuyang og iskor. Mahimo na lang kining 25-30 puntos ug sila na sab si Gasol ug Fisher maoy motimon sa opensa. Niining tungora, must-win ang Lakers aron magtangag og 2-0 nga bentaha atol sa pagbalhin sa mosunod tulo ka duwa didto sa TD Garden, ang balwarte sa Celtics. Mas pabor ang Lakers kung mahimo kining high-scoring game ug moabot ang iskor og 100 puntos pataas apan modaug ang Celtics kung low-scoring game sa iskor 95 puntos paubos. Dinhi modaug ang Boston dili mo-menos singko puntos.

Game 3--- Mobalhin ang duwa sa TD Banknorth Garden. Tataw kaayo nga mobawos ang Celtics ug dili man tingali malubong ang Lakers parehas sa Game 3 sa Orlando diin ilang gilubong ang Magic, 94-71, apan modaug ang Celtics. Mahimo nga sila'y maka-una sa serye sa 2-1 depende sa resulta sa unang duha ka duwa didto sa Staples Center.

Game 4--- Adto gihapon sa korte sa Boston. Kung dili mo-adjust ang Lakers, Boston gihapon ang modaug apan posible nga sikit ang maong kadaugan. Kung mahitabo kini, ang Boston maghupot og 3-1 nga baraha.

Game 5--- Tugotan nato nga lisod pagdaug og tulo ka sagunson nga duwa batok sa mao gihapong kaatbang , busa mahimong Lakers ang modaug apan kini sikit gihapon nga duwa nga mahimo pa ganing mo-abot og overtime. Hinoon, tungod sa mga dumadapig sa Celtics, posible nga sila gihapon maoy modaug. Kung modaug ang Lakers, magtangag sila'g 2-3 nga baraha balik sa L.A. sa Game 6 ug sa higayon nga magtabla sa 3-3, Lakers na maoy modaug sa Game 7. Sa regular season, sayon ra pagsagunson og tulo ka daug o bisan lima tungod kay lain-lain man ang kontra ug hagip-ot ang lugar alang sa paghimo og dinali-daling adjustments gawas lang tingali og maayong laki gyud kaayo ang coach.

Game 6-- Mobalik ang duwa sa Lakers. Must-win ang Celtics ug sa higayon nga Celtics maoy maka-una sa serye sa 3-2, mahimong magdaug na niining tungora ug magsaulog ang Boston sa ilang debut. Buot pasabot ika-18 nga korona.

Game 7--- Kung ang serye magtabla sa 3-3, Lakers ang modaug didto sa Staples Center alang sa ilang ika-16 nga korona.  – BANAT NEWS