Sugdan karong adlawa ang labing gikahinaman nga 2010 NBA Finals ug ang defending champion Los Angeles Lakers maoy mo-host sa unang duwa ingon man sa ikaduhang duwa sunod adlaw didto sa Staples Staples sa Los Angeles, California.
Duha ka tuig ang milabay, ang Celtics midaug sa ilang ika-17 nga korona batok sa Lakers ug si Paul Pierce maoy napiling finals MVP. Sa miaging tuig, midaog ang Lakers batok sa Orlando Magic ug si Kobe Bryant maoy Finals MVP. Parehong maayong laki sa opensa ug parehong adunay katakos mohatag og kampiyonato sa ilang team isip franchise players.
Niadtong tungora, ang mga relibo o mga back-up players sa Boston maoy daku kaayo’g natabang sa ilang kampanya ug karon wala kini kausaban—nausab lang ang mga ngalan apan ang ilang kontribusyon wala mausab.
Matod pa ni Pierce nga wala kaayo’y maghisgot sa mga role players kung unsa kadaku ang ilang ikatabang aron modaug ang team.
Ang maong grupo nga gipasabot ni Pierce nga nakatabang dihang ilang gipalagppt ang Miami sulod sa lima ka duwa ug ang Cleveland ug Orlando sulod sa unom ka duwa, mao sila si Rasheed Wallace, Glen ‘Big Baby’ Davis, Tony Allen ug Nate Robinson kinsa mo-iskor og 13 puntos sa second period batok sa Magic sa Game 6 aron mo-abante sa Finals.
Kaniadto ang ilang mga relibo naglakip kanilang James Posey, P.J. Brown, Eddie House ug Sam Cassell ug ang Celtics maoy nahimong kampiyon duha na ka tuig ang milabay. Silang upat maayong nakadepensa sulod sa unom ka duwa ug mi-outscore sa bench sa Lakers.
Karong adlawa, makita ang opensa ni Pierce, ang depensa ni Kevin Garnett, ang kakugihan ni Ray Allen, ang kaabtik ni Rajon Rondo ug ang kaisog o kamasuk-anon ni Kendrick Perkins kinsa gitawag og “scowling menace”.
Gika-intapan ang trio nilang Bryant, Pau Gasol ug Derek Fisher ug suportahan sila ni Ron Artest, Andrew Bynum sa ilawom ug Lamar Odom isip reserba.
Daan nang gipanagna nga hugot kaayo ang maong serye nga molungtad og seven games.
Sa regular season, midaug ang Lakers didto sa TD Garden sa iskor, 90-89 niadtong Enero 31 ug sa ilang rematch, midaug ang Boston didto sa Staples Center sa iskor, 87-86 niadtong Pebrero 18.