Jaguars mitumba sa Knights

CEBU, Philippines - Nagpauwan og 3-pointers ang University of San Jose-Recoletos (USJ-R) Jaguars nga maoy ilang gihimong hinagiban pagbuntog sa Asian College of Technology (ACT) Cyber Knights sa Talamban Open and Inter-Club basketball tournament didto sa Talamban covered court.

Hinuon, bisan unom lang sila ka players, nagpakita gihapon og katakus ang Cyber Knights tungod kay kanunay kining moilog sa labaw hangtod sa fourth quarter.

Katapusang nakasikit ang Cyber Knights sa iskor nga 53-55 kay mibalik ang kamangtas sa Jaguars. 

Nasentro sa duwa sa Cyber Knights mao si black American missionary Clarence Jeffery, kinsa milingaw sa mga manan-away tungod sa iyang one-man demolition job.

Tungod sa hugot nga depensa ug sa kalapoy, si Jeffery mihinay ug napugngan didto sa tunga-tungang bahin sa fourth period apan nakahimo gihapon sa pagpangu sa Cyber Knights nga mipabuto og 22 puntos.

Si Lapiz, kinsa mitusak og upat ka triples ug si Edwin Bibera maoy nangu sa Jaguars nga parehong milawog og 16 puntos, samtang si Carlo Albarillo nga adunay duha ka triples mihungit og otso puntos.

Ang Jaguars maoy makigsangka sa ilang sister team ug no. 2 seed Ave Maria Sanctuary Park Xmen 2 sa semifinals, samtang ang topseed Ave Maria Xmen 1 makigsangka batok sa Cyber Knights.

PUNTOS MATAG USA

USJ-R (72) - Lapiz 16, Bibera 16, Albarillo 8, Amores 7, Dela Peña 5, Abing 5, Nudalo 4, Suliman 4, Olbedado 3, Bucayan 2

ACT (63) - Jeffery 22, Valencia 16, Pontemayor 9, Alicaway 6, Buchorno 6, Campaner 4   (BANATNEWS)