Top riders pasidunggan na karon

CEBU, Philippines - Pasidunggan na ang mga top performers sa 2009 MS Motosuit Motocross Series karong gabii diha sa panimalay ni MS Motosuit big boss Lou Ornopia.

Hataga'g pasidungog mao ang 2009 champions sa nagkalain-laing mga kategoriya naglakip ni BJ Pepito sa pewee division, Earl Jean Brylle Ornopia sa mini class, Dongkey Sanchez sa local enduro uban ang 527 puntos, open Enduro nga adunay 543 puntos ug sa beginners open production C nga may 442 puntos.

Si Dr. Felipe Montejo mikutlo'g 346 puntos aron ilogon ang korona gikan ni 2008 executive C champion Butch Flores. Si Jun Enriquez nagpabiling hari sa executive B, samtang si 2008 Rider of the Year awardee Siegfred Ornopia magpabilin sa iyang trono sa executive nga adunay 613 puntos.

Mikutlo'g 489 puntos si John Flores aron madaog ang grand prize sa novice open production, si Juvenille Abellar naghari sa intermediate class sa iyang 448 puntos, samtang si Jonjon Adlawan mao ang nigawas nga overall champion sa expert category sa iyang 490 puntos.

Kuwalipikado silang tanan alang sa "Rider of the Year," nga ipahibalo human sa presentasyon sa tanang kampiyon sa matag kategoriya.

Ang maong kalihukan gipaluyohan sa Castrol Power One, Progress Marketing, Reliance Motor Parts, Race & Trail SPorts Plaza, Hatch Motor Parts, SGC Phils., Golden Amour, Gaib USA Fork Oil, Access Plus, Philippine Suntal, Minton Marketing, Ranilo Santillan ug Joy Flores.  – BANAT NEWS