Magic lubong, Boston 3-0

CEBU, Philippines - Mihatag na og tin-aw nga mensahe ang Boston Celtics nga andam na silang mo-abante balik ngadto sa NBA Finals human mapakyas sa miaging tuig dihang ilang gibukbok ang Orlando Magic sa iskor, 94-71 atol sa Game 3 sa ilang Eastern Conference Finals kagahapon didto sa TD Banknorth Garden sa Boston, Massachusetts.

Ang Celtics naghupot na karon og 3-0 nga abante ug naglaraw og 4-0 sweep ugmang adlawa didto gihapon sa ilang korte ug wala pa mahitabo sa kasaysayan nga ang team nga naghupot ug 3-0 nga baraha napilde sa best-of-seven series.

Hinoon, usa kini ka pahimangno alang ngadto sa Celtics tungod kay lahi ang nahitabo sa NHL o duwang ice hockey tungod kay ang 0-3 nga Philadelphia Flyers mikulit og upat ka sagunson nga daug aron palagpoton ang Boston Bruins sa East semis.

Sa napulo ka higayon nga ang Celtics naghupot og 3-0 nga abante, upat niini ka higayon nga ilang gi-sweep ang kaatbang ug unom ka higayon nga midaug sila sulod lang sa lima ka duwa.

Atol sa Game 3 kagahapon, dili ang nagkatiguwang nga Big Three— Paul Pierce, Ray Allen ug Kevin Garnett maoy mihatag og dakung danyos batok sa Magic apan ang duha nila ka batan-ong players nga sila si Glen “Big Baby” Davis ug Rajon Rondo maoy naghatag ug labad sa ulo.

Si Davis kinsa usa ka back-up center, maoy nangu sa opensa gikan sa bench human siya mohakot og 17 puntos uban ang unom ka rebounds samtang si Rondo midugang og 11 puntos lakip na ang iyang 12 ka assists. Ang laing reserve nga si Rasheed Wallace miposa og 10 puntos.

Si Pierce, ang 2008 Finals MVP maoy nangu sa starters sa iyang 15 puntos, midugang si Allen ug 14 puntos ug si Garnett may 10 puntos.

Laing hugot nga depensa ang gihimo sa Celtics aron pugngan si Dwight Howard ngadto lang sa siete puntos ug nakauha sab siya’g pito lang ka rebounds apan sila si Vince Carter ug Jameer Nelson maoy nangu sa opensa sa parehong 15 puntos.

Kinahanglan modaug ang Magic ugma aron malikayan ang sweep ug aron sab makabalik ngadto sa Orlando ang duwa sa Game 5.

Kontrolado sa Celtics ang duwa gikan gyud sa pagsugod ug dihang naglabaw na sila sa third quarter, 75-47, nagsige na’g siyagit ang mga crowd sa Boston “Beat LA!” Ang LA Lakers aduna nay 2-0 nga abante batok sa Phoenix Suns sa ilang Western Conference Finals ug karon ang Game 3 didto sa US Airways Center sa Phoenix, Arizona.

Ang Celtics naglabaw na og labing menos 32 puntos pagsugod sa fourth period, 85-53 hangtod nga padayon silang gilat-an og wala gyud nila tugoti ang Magic nga makabadbad sa dakung biya.  - GGM gikan sa NBA.com (BANAT NEWS)