Canillas makighilam-osay na'g kumo ni Mendoza sa "Best of Boxing I"

CEBU, Philippines - Buhian na ang nagbagang mga suntok ni ALA Boy Larry 'Bon Jovi' Canillas sa dihang makighilam-osay kini'g kumo batok ni Dexter Mendoza sa main event sa "Best of Boxing I" boxing card karong gabii diha sa Mandaue City Cultural and Sports Complex.

Masentro karon sa atensiyon sa mga boxing fans si Canillas dihang gihimong main event ang ilang away ni Mendoza tungod sa pagka-aksidente ni former two-time world champion Katsunari Takayama.

Si Takayama dili makaaway karon tungod sa wrist injury nga iyang naangkon human ma-slide samtang nag-jogging duol sa ALA Boxing gym sa Talamban.

Karong gabii, paninguhaon ni Canillas nga tumbahon ang taga-Manila nga si Mendoza aron mokulit sa ikaunom niyang sunod-sunod nga kadaugan.

Ang garbo sa Lutopan, Toledo nga si Canillas nagbitbit og 12-2, 11KOs nga baraha, samtang si Mendoza adunay 11-2,7KOs.

Sa supporting bout, ang taga-Tagbilaran nga si Arnel Tadena (8-5, 4KOs), kinsa maoy mihulip sa papel ni Takayama mao na karon ang mosukod sa kusog sa beteranong si Jayson Rotoni (10-5, 6KOs), samtang ang beterano ug sipat nga si Jojo 'Flash' Intor (11-6-5, 5KOs) makigsangka usab batok ni Mark Jesson Taroja (5-3-1, 2KOs)

Ang Sugbuanong bantamweight prospect nga si Rolito Gasca (12-1, 2KOs) makigbatok ni Jessie Albaracin (6-3-3, 5KOs) sa Davao sa ilang ten-rounder bout.

Mokompleto sa undercard sa maong boxing event nga gipasiugdahan sa ALA Promotions, mao si Markjhun Makahilig batok Elbert Guardiado, Jamjam Ungon batok Joy Pol ug Jicky Gaco batok Carlito Solante. – BANAT NEWS