'Bon Jovi' Canillas way patawad, moaway sa "Best of Boxing 1"

CEBU, Philippines - Wala pa gani dangti'g usa   ka bulan human sa iyang impresibong kadaugan, apan si super bantamweight prospect Larry 'Bon Jovi' Canillas walay kukahadlok nga makigbinukbukay batok ni Dexter Mendoza sa   main event sa "Best of Boxing 1" ugma sa gabii diha sa Mandaue City Cultural and Sports Complex.

Si Canillas lab-as pa gikan sa labing una niyang away gawas sa nasud batok ni African Fred Sayuni sa "Philippines vs. The Rest of the World" boxing card niadtong Abril 22 didto sa   Dubai Tennis Arena sa United Arab Emirates (UAE).

Si Canillas (12-2, 11KOs) mag-atubang na sab kini og laing hagit ug ning higayona batok ni Dexter Mendoza (11-7, 4KOs) sa Metro Manila.

Wala mosaad og knockdown si Canillas, apan iyang paningkamotan nga iyang matumba ang bisitang si Mendoza.

Sa press conference kagahapon didto sa Nook sa City Sports Club-Cebu, si ALA Promotions president Michael Aldeguer miingon nga ang pag-away ni Canillas sa wala pay bulan dili makadaot, mas makatampo hinuon kini sa pagbaid ug paglambo sa iyang kasinatian.

Sa supporting bout, ang taga-Tagbilaran nga si Arnel Tadena (8-5, 4KOs), nga maoy mihulip sa na-injured nga si Katsunari Takayama, makigsangka batok ni knockout artist Jayson Rotoni (10-5, 6KOs) sa Manila.

Si Takayama dili na mahimong mo-away ugma tungod sa wrist injury. Si Takayama, kinsa mihimo sa iyang final road work didto sa gawas sa ALA Boxing Gym alang sa iyang away, milikay sa nagdong nga sakyanan ug nadakin-as kini hinungdan sa iyang injury.

Si Takayama, ang labing unang langyaw'ng boksidor nga mipasilong ubos sa landong sa nabantog nga ALA Gym, makigsinukliay unta'g kumo batok ni Rotoni. Ang iyang sangka magsilbe untang tune-up fight sa dili pa niya atubangon si South African boxer Tshepo Lee alang sa usa ka IBF eliminator karong Agosto 27.

Mohugyaw sa boxing card mao ang beteranong si Jun Intor, kinsa makiglamok-lamok ni Mark Jesson Taroja. Ang taga-Barili nga si Rolito Gasca makigbinukbukay batok ni Jessie Albaracin, samtang si Marjuhun Makahilig   moharong ni Elbert Guardiado.

Mokompleto sa undercard mao ang duha ka four-rounder bout tali nila ni Jam-Jam Ungon batok ni Joy Pol ug Jocky Gaco batok Carlito Solante.

Ang mga tiket nagkantidad og P500 alang sa VIP, P300 sa ring side, P150 sa lower box, samtang ang general admission libre sa tanan nga buot mosaksi sa   kulbahinam nga boxing card.

Mapalit ang mga tiket sa Mandaue Sports Complex. Alang sa ticket reservations tawag lang sa ALA Promotions Office   sa numero 236-4611. – BANAT NEWS