Losiaboi Midominar sa Rundaue 2010

CEBU, Philippines - Sa makausa pa, migawas na usab nga mananaug ang Kenyan missionary nga si Simon Losiaboi kinsa maoy migawas nga over-all champion sa 10k category sa gipahigayung Rundaue 2010 kagahapon diha sa Parkmall carpark sa North Reclamation Area.

Si Losiaboi kinsa nagsugod sa iyang karera sa running dinhi sa Sugbu niadto pang Oktubre sa miaging tuig, maoy naglawig human niya gilabang ang finishline sulod sa 36 minutos ug kwatro segundos. Hinuon, si Losiaboi nagtuo nga adunay gamay'ng kakulian sa rota sa maong lumba tungod kay milapas kini og usa ka kilometro nga maoy rasun sa pag-ubos sa iyang personal time.

Nagsunod ni Losiaboi mao ang taga-Danao nga si Philip Dueñas kinsa mitapos sa ikaduhang dapit sa oras nga 37:57, samtang si Riez Enriquez mipahiluna sa ikatulong dapit sa oras nga 38:07.

Mokumpleto sa top-six finishers sa 10k mao sila si Jess Gonzaga (38:13) Noel Tillar (41:22) ug Alverz Busa (41:23). Wala usab magpauwahi si Mary Grace delos Santos kinsa maoy bugtong babaye nga nakasulod sa top 10 sa iyang oras nga 42:56.

Bisan paman og gihimong “open-for-all” category ang lumba, nakadawat gihapon og special award si Delos Santos kinsa gikoronahang “top-female performer”.

Ang coach ni Delos Santos nga si Sherwin Manaquil nagsunod ni Delos Santos sa ikawalong dapit sa oras nga 43:27, samtang si Leo Abello (43:27) ug Roger Saldo (45:03) maoy migawas nga ninth ug tenth placer.

Si kanhi RP team member ug higpit nga karibal ni Losiaboi nga si Mendel Lopez nagpalahi human kini nakahukom nga mudagan sa 5K division, diin siya maoy mikampiyon sa oras nga 20:06, uban sa mga runner-ups nga sila si Joel Delposo (20:53) ug Joel Montebon (20:53). Sama ni Delos Santos, gibayaw usab nga “top-female performer” si Clarrise Diongson kinsa maoy seventh placer sa 5k sa oras nga 28:49.

Sa 3k category, midominar si Jorry Ycong sa oras nga 11:11, gisundan ni Michael Estrera (11:17) ug Ian Bernido (11:28) kinsa maoy mi-okupar sa ikaduha. – BANAT NEWS