Khan mipahunong ni Malignaggi sa Rd.11

CEBU, Philippines - Wala na makahimo pa og tabi ang amerikanong si Paulie Malignaggi human siya nakatilaw og kulata gikan sa Briton nga si Amir Khan kinsa milampos pagpanalipod sa iyang WBA title sa ilang sangka kagahapon didto sa New York.

Ang kanhi Olympian ug bata ni Freddie Roach nga si Khan mipakita sa iyang kabangis nga miresulta sa pagkaputos sa bun-og ni Malignaggi kinsa wala na kaantos og misurender na atol sa 11th round sa away.

Sa pagsugod palang sa away, nakita na dayun ang dakung bintaha sa gipaspasin og kusog ni Khan ngadto sa pagarparon nga si Malignaggi kinsa usa sa mga padayong mipasangil ni Pacquiao nga tigamitan kini og illegal nga drugas.

"I think with my speed I can catch any fighter,I knew I was going to catch him and I could see him getting his head knocked back. I could see him get frustrated." matud pa ni Khan.

Hinuon, sa katapusan giangkon ni Malignaggi nga di siya kapiog ni Khan ug gi-asuy niya nga maglisud na siya og buhi og kinumo tungod sa kaluya atol sa 1:25 sa 11th round, diin gihunong ni referee Steve Smoger ang away.

”He knows how to win rounds, man,He has a lot of ability.” matud pa sa Italian-American.

Nahimong interesante ang maong away tungod sa personal nga kalagot sa duha ka boksidor sa usag-usa tungod usab sa isyu sa illegal nga drugas, diin gipasanginlan ni Malignaggi si Khan nga tigamitan usab og steroids sama sa higala niini nga si Pacquiao.

Usa ka adlaw sa wala pa ang away, usa ka kagubot ang miulbo atol sa weigh-in human magkarambola ang duha ka boksidor uban ang tagsa-tagsa nila ka kampo tunga sa stage.

Human sa iyang kadaugan, daling gibutyag ni Khan nga gusto niyang hutdon ang tanang kusgang boksidor sa 140 lbs division usa na niini ang Argentinian nga si Marcus Maidana.

Mipaambit usab si Khan sa iyang pasalamat ngadto ni six-division world champion Manny Pacquiao kinsa iyang gihulagway nga usa sa mga nakapalambo sa iyang abilidad sa pamuksing.

“Manny is a great guy. I learned from him when we sparred and helped each other and he helped me a lot in building my confidence by working with him. He is just a nice guy.” dugang pa ni Khan.  - Lemuel P. Maglinte gikan sa AP (BANAT NEWS)